ಗಲ್ಪಾಚೆಂ ಜೀವನ್......

ಗಲ್ಪಾಚೆಂ ಜೀವನ್......

ವರ್ಸಾಂ‌ ಜಾಲಿಂ ಸಾತ್

ದರೊನ್‌ ಗಲ್ಪಾಚಿ ವಾಟ್

ಆಸಾಂ ಕರ್ಗೊನ್ ದೀಸ್ ರಾತ್

ನಾಸ್ತಾನಾ ಕುಟ್ಮಾಚೊ ಸಾಂಗಾತ್

ಎಕ್ಸುರಾಯ್ ಭಗ್ತಾ ಘರ್ಚ್ಯಾಂಕ್ ಚಿಂತಾನಾ

ವಾಳ್ತಾತ್ ದುಃಖಾಂ ಕುಟ್ಮಾಕ್ ನಿಯಾಳ್ತಾನಾ

ಕಾಳಿಜ್ ಕಡೊನ್ ಲಾಚಾರ್ ಜಾತಾ

ಬುರ್ಗ್ಯಾಂ ಭಾಳಾಂ ಲಾಗಿಂ ಖೆಳ್ಚೆಂ ಚುಕ್ತಾನಾ

ಜೀವಿತ್ ನಾಕಾ ಮ್ಹಣ್ ಭಗ್ತಾ

ಕಠಿಣ್ ವೊತಾಕ್ ಕುಡ್ ಕರ್ಪಾತಾನಾ

ನಾಕಾ ಮ್ಹಳ್ಯಾರಿ ಘರ್ಚಿ ಖಂತ್ ದೊಸ್ತಾ

ಕಠಿಣ್ ಹಿಂವೆಕ್ ಕುಡ್ ಕಾಂಪ್ತಾನಾ

ಪೊಟಾಂತ್ ಕಿಡಿಯೊ ಬೊಬೊ ಗಾಲ್ತಾತ್

ಘರ್ಚೆಂ ರುಚಿಕ್ ರಾಂದಾಪ್ ಚಿಂತಾನಾ

ಪೊಲ್ಯಾನಿಂ ದುಃಖಾಂ ದೆಂವ್ತಾತ್

ಕುಬುಸ್ ಆನಿ ಸುಲೆಮಾನಿ ಖಾತಾನಾ

ಹಾಡೆಯ್ಲೆಂ ಆಮ್ಕಾಂ ಪುಡಾರಾಚ್ಯಾ ಸ್ವಪ್ಣಾನ್

ಕರ್ಪಾಲಿ ಆಶಾ ಉಜ್ಯಾಸಾರ್ಕ್ಯಾ ವೊತಾನ್

ಕಿತೆಂಚ್ ಹಾತಾಂತ್ ಉರಾನಾ ಹಾಂಗಾಚ್ಯಾ ಖರ್ಚಾನ್

ಕೇಸ್ ಸಗ್ಳೆ ಜಡ್ಲ್ಯಾತ್ ಗಲ್ಪಾಚ್ಯಾ ಉದ್ಕಾನ್

ನಾ ಆಮ್ಕಾಂ ಫೆಸ್ತ್ -ಪರಬ್ ಗಮ್ಮತಾಂ

ಪಿಡೆ ಶಿಡೆಂತ್ ನಾ ಕೊಣಿ ಕೊಣಾಕ್ ಇಸರ್ತಾ

ಚಿಂತಾ ಚಿಂತಾ ಘರ್ಚೊ ಉಡಾಸ್ ಜಿವಾಳ್ತಾ

ಗಾವಾಕ್ ಗೆಲ್ಯಾರಿ ಪರತ್ ಗಲ್ಪ್ ಅಪಯ್ತಾ...

ಥೊಡ್ಯಾಂಕ್ ಗಲ್ಪ್ ಎಕ್ ಸ್ವರ್ಗ್ ಅಸ್ಲೆಲ್ಯಾಬರಿ

ಸರ್ಗಾರ್ ಬಾಂದ್ಲೆಲ್ಯಾ ಪಾಳ್ಣ್ಯಾಂತ್ ದಲುಲ್ಯಾಬರಿ

ಆನಿ ಥೊಡ್ಯಾಂಕ್ ಯಮ್ಕೊಂಡ್ ಅಸ್ಲೆಲ್ಯಾಬರಿ

ಎಕ್ಸುರ್ಪಣಾಚ್ಯಾ ಉಜ್ಯಾಂತ್ ಲಾಸ್ಲೆಲ್ಯಾಬರಿ

:- ಸುರೇಶ್ ಸಲ್ಡಾನ್ಹಾ, ಸಕಲೇಶ್ಪುರ್

( ಗಲ್ಪಾಕ್ ಯೇವ್ನ್ ಸಾತ್ ವರ್ಸಾಂ ಸಂಪ್ತಾನಾ, ಬರಯಿಲ್ಲೆಂ ಹೆಂ ಕವನ್‌ ಜಾವ್ನಾಸಾ)