ಬುರ್ಗ್ಯಾಪಣಾ ಪರತ್ ತುಂ ಜಲ್ಮೊನ್ ಯೆ

ಬುರ್ಗ್ಯಾಪಣಾ ಪರತ್  ತುಂ ಜಲ್ಮೊನ್  ಯೆ

ತೆದ್ನಾಂ ದುಬ್ಳಿಗಾಯ್ ಆಸ್ಲೆಲಿ

ಭುಕೆನ್ ಕುಡ್ ಲಾಸ್ಲೆಲಿ

ತೆದ್ನಾಂ ತೆದ್ನಾಂ ಜೆಂವ್ಚ್ಯಾ

ಪೆಜೆಂತ್ ಕುಡಿಕ್ ಸಕತ್ ಮೆಳ್ತೆಲಿ....

ತೆದ್ನಾಂ ಖೆಳೊಂಕ್ ವಸ್ತು ನಾತ್ಲ್ಯಾರಿ

ಖೆಳಾಂತ್ ಮಗ್ನ್ ಆಸ್ತೆಲ್ಯಾಂವ್

ವರ್ಸಾಕ್ ಏಕ್ ಫೆಸ್ತ್ ಆಸ್ಲ್ಯಾರಿ

ಆಸ್ಲೆಲ್ಯಾಂತ್ ಬರೆಂ ನೆಸ್ತೆಲ್ಯಾಂವ್

ಫೆಸ್ತಾ ದಿಸಾ ಸಣ್ಣ ಬಬೊ ಉಕ್ಕೊಡ್ತಾನಾ

ಪೊಟಾಂತ್ ಕಿಡಿಯೊ ಬೊಬೊಟ್ತಾಲ್ಯೊ..

ಗುಡಾಂತ್ಲ್ಯಾ ಕೊಂಬ್ಯಾಕ್ ದರ್ನ್ ಕಾತಾರ್ತಾನಾ

ನಿಸ್ತ್ಯಾಚೊ ಪರ್ಮೊಳ್ ವಾಡ್ಯಾಂತ್ ಪಾಚಾರ್ತಾಲೊ

ಖೆಳೊಂಕ್ ಆಬಾನ್ ಲಾಯ್ಲೆಲೆ ರುಕ್ ಆಸ್ತೆಲೆ

ನಿದೊಂಕ್ ಮಾಂಯ್ಚೊ ಕಾಣಿಯೊ ಆಸ್ತೆಲೆ

ಅಂಗ್ಣಾಂತ್ ಕುಟ್ಮಾ ಸಂಗಿ ಪಣಸ್ ಕಾತಾರ್ತಾನಾ

ಸರ್ವಾಂಚ್ಯಾ ತೊಂಡಾರ್ ಹಾಸೊ ಆಸ್ತೆಲೆ

ಪ್ರಾಸ್ಟಿಕ್ ಬೊಲ್ ತೊ ಹಾತಿಂ ಘೆವೊನ್

ಪಿಡ್ಯಾಕ್ ಕಾತ್ರೊನ್ ತಾಚೆ ಬ್ಯಾಟ್ ಕರೊನ್

ಗಾದ್ಯಾಂತ್ ಖೆಳ್ತಾಸ್ತಾನಾ , ಹಾಂವ್ ಪಯ್ಲೆಂ ...

ಮ್ಹಣೊನ್ ಜಗಡ್ಚಿ ಮ್ಹಜಾ ವಿಂಗಡ್ಚ್ ಆಸ್ತೆಲಿ...

ಜಾಂಬ್ಳಾ ಖಾವ್ನ್ ಜೀಬೆಚೊ ರಂಗ್ ಬದ್ಲತಾನಾ

ಚಿತುರ್ಲೆ ಖಾವ್ನ್ ಕುಡ್ ಸಗ್ಳಿ ಪರ್ಮಳ್ತಾನಾ

ವಿವಿದ್ ಪಳಾಂ ಖಾವ್ನ್ ದೆಂಕ್ ಕಾಡ್ತಾನಾ

ಸುಡೆತ್ಯಾಂಚಿ ವ್ಹಾಚಾಂ ಹಾತಾರ್ ಸೊಭ್ತಾನಾ

ಗಾಂವ್ ಬೊಂವೊಂಕ್ ಸ್ಯೆಕಲಾಚೆ ಟಯರ್ ಆಸ್ತೆಲೆಂ

ಪಾವ್ಶಾಕ್ ಪಿಯಾವಾಚಿ ಗೊಣಿ ಆಸ್ತೆಲಿ

ಪಾವ್ಶಾಂತ್ ಬಿಜೊಂಕ್ ಖುಬ್ ಮ್ಹಜಾ ಯೆತಾಲಿ

ತಾಪ್ ಆಯ್ಲ್ಯಾರ್ ಹಪ್ತೊಬರ್ ರಜಾ ಮೆಳ್ತೆಲಿ

ಮೊರಿಯೆಚ್ಯಾ ಉದ್ಕಾಂತ್ ದೊಣ್ ಸೊಡ್ತೆಲ್ಯಾಂವ್

ತೊಡಾಚ್ಯಾ ಉದ್ಕಾಂತ್ ಮಾಸ್ಳಿ ಪಾಗ್ತೆಲ್ಯಾಂವ್

ಆಂಗ್ಣಾಂತ್ ಕುಂಟಾಬಿಲ್ಲೆ ಖೆಳ್ತೆಲ್ಯಾಂವ್

ಗಾದ್ಯಾನಿಂ ಗೊರ್ವಾಂಕ್ ಚರೆಯ್ತೆಲ್ಯಾಂವ್

ಶಿಕ್ಪಾಕ್ ಗಾಂವ್ಚೆ ಲ್ಹಾನ್ ಇಸ್ಕೊಲ್ ಆಸ್ಲೆಂ

ಬಂವ್ಚ್ಯಾಕ್ ವ್ಹಡ್ ಜಯ್ತ್ ರಾನ್ ಆಸ್ಲೆಂ

ಸಾವ್ಳೆಕ್ ಮಾರ್ಗಾದೆಗೆರ್ ಸಬಾರ್ ರುಕ್ ಆಸ್ಲೆ

ಖಾಂವ್ಕ್ ಆಂಬೆ , ಪಣಸ್, ಪೆರಾಂ ಕಾಜು ಆಸ್ಲೆ

ಇಸ್ಕಾಲಾಂತ್ ಉಲಯ್ಲ್ಯಾರ್ ಲಿಡರಾಚ್ಯೊ ತ್ಯೊ ದೊಶಿ

ಲೊಂಗ್ ಬೆಲ್ ಮಾರ್ತಾನಾ ಜಾಂವ್ಚಿ ತಿ ಕುಶಿ

ಜಾಮೆಟ್ರಿ ಬೊಕ್ಸಾಂತ್ ಬಳಪ ದವರ್ಚಿ ತಿ ಕುಶಿ

ಉಕ್ತಲೇಖನ ಸುಕ್ ಜಾಲ್ಯಾರ್ 100 ಪಾಂವ್ಟಿ ಬರೊಂವ್ಚಿ ಪಾಶಿ

ಸ್ವತಂತ್ರ್ ದಿವಸಾಕ್ ಬಾವ್ಟೊ ಉಬೊನ್

ಎಕೆಕ್ ಬೊಂದಿ ಲಾಡ್ವಾಕ್ ಜಗ್ದೊನ್

ರಜೆಚ್ಯಾ ದಿಸಾನಿ ಸರ್ವ್ ಬುರ್ಗಿಂ ಸಂಗಿ ಮೆಳೊನ್

ಆಸ್ತೆಲ್ಯಾಂವ್ ಲಗೋರಿ, ಕುಟ್ಟಿ ದೊಣ್ಣೊ ಖೆಳೊನ್

ಕಿತೆಂಚ್ ನಾತ್ಲೆ ಮ್ಹಣ್ಚ್ಯಾ ಆಮ್ಕಾಂ ಸರ್ವ್ ಆಸ್ಲೆಂ

ಕುಟ್ಮಾ ಮದೆಂ ಮೊಗಾಚೊ ಬಾಂದ್ ಆಸ್ಲೊ

ನಿತಳ್ ನಿಸ್ಕಳ್ ನಿರ್ಮೊಳ್ ಇಷ್ಟಾಗಾತ್ ಆಸ್ಲಿ

ಎಕಾಮೆಕಾಕ್ ಗರ್ಜೆಕ್ ಪಾಂವ್ಚೆಂ ಮೊಗಾಚೆಂ ಸೆಜಾರ್ ಆಸ್ಲೆಂ

ಆತಾಂ ಸರ್ವ್ ಆಸೊನಿ ಕಿತೆಂಚ್ ನಾ ಜಾಲಾಂ

ಕಾಳ್ಜಾನಿಂ ಪೆಟ್ಲ್ಯಾತ್ ಉಜ್ಯಾಚಿಂ ಕಿಟಾಳಾಂ

ಗ್ರೇಸ್ತ್ ಕಾಯೆನ್ ದುಬ್ಳೊ ದಿಸಾನಾ ಜಾಲಾ

ಪ್ಲಾಟಾಚ್ಯಾ ಕುಡಾಕ್ ಜಿವಿತ್ ವೊಂದಾಲಾಂ

ಬುರ್ಗ್ಯಾಪಣಾ ಪರತ್ ತುಂ ಜಲ್ಮೊನ್ ಯೆ

ತುಜ್ಯಾ ತ್ಯಾ ಖೆಳಾನಿಂ ಬರೊಂವ್ಕ್ ತುಂ ಯೆ

ನೆಂಟ್ಯಾಪಣಾಚೊ ಉಗ್ದಾಸ್ ಜಿವಾಳ್ ಕರೊಂಕ್ ಯೆ

ಯೆ ಯೆ ಬುರ್ಗ್ಯಾಪಣಾ ಪರತ್ ತುಂ ಜಲ್ಮೊನ್ ಯೆ...

ಕೊಂಕ್ಣೆಕ್ : ಸುರೇಶ್ ಸಲ್ಡಾನ್ಹಾ, ಸಕಲೇಶ್ಪುರ (ಪನ್ವೆಲ್)

ಮೂಳ್ : ಕನ್ನಡ, ವಾಟ್ಸಾಪ್

------------------------------------------------------

(ಹ್ಯಾ ಕವಿತೆಚೆಂ ಮೂಳ್ ಕನ್ನಡಾಚೆಂ ಜಾವ್ನಾಸಾ, ಹಿ ಕವಿತಾ ಕೊಣೆ ಬರಯ್ಲಿ ಕಳಿತ್ ನಾ, ಹಿ ಕವಿತಾ ಬರಯಿಲ್ಯಾ ಕವಿಕ್ ಮ್ಹಜೊ ಪ್ರಣಾಮ್. ಬೊವ್ ಬರ್ಯ್ಯಾ ರಿತಿನ್ ಬುರ್ಗ್ಯಾಪಣ್ ಜಿವಾಳ್ ಕೆಲಾಂ. ಹಿ ಕವಿತಾ ಕೊಂಕ್ಣೆಕ್ ತರ್ಜುಮೊ ಕರ್ತಾನಾ ಹಾಂತು ಥೊಡೆಂ ವೊಳಿ ಮ್ಹಜೆ ಸ್ವ ಕಾಲ್ಪನಿಕ್ ಜಾವ್ನಾಸಾತ್. ದಯಾಕರ್ನ್ ಕೊಣಿ ಕವಿತಾ ನಕಲ್ ಕರ್ತಾನಾ ಬರಯ್ಣಾರಾಚೆಂ ನಾಂವ್ ಮಿಟಯ್ನಾಕತ್ , ಮಿಟಯ್ಲ್ಯಾರ್ ಹ್ಯಾ ವಯ್ಲ್ಯಾ ಕವಿತೆಬರಿ, ಮೂಳ್ ಕವಿ ಕೊಣ್ ತೆಂ ಆಮ್ಕಾಂ ಕಳಿತ್ ಜಾಂವ್ಚೆನಾಂ.)

ದೇವ್ ಬರೆಂ ಕರುಂ.