ಕೊಂಕ್ಣಿ ಉಲಯ್ ಕೊಂಕ್ಣಿ ಉರಯ್

ಕೊಂಕ್ಣಿ ಉಲಯ್ ಕೊಂಕ್ಣಿ ಉರಯ್

ದೋಗ್ ಮಲ್ಬಾರಿ ಯಾ ದೋಗ್ ಬಿಯಾರಿ

ದೋಗ್ ಮರಾಠಿ ಯಾ ದೋಗ್ ಗುಜಾರಾತಿ

ದೋಗ್ ಬಂಗಾಳಿ ಯಾ ದೋಗ್ ನೇಪಾಳಿ

ಸಂಗಿ ಮೆಳ್ಳ್ಯಾರ್ ತಾಂಚ್ಯಾ ತಾಂಚ್ಯಾ

ಬಾಶೆಂತ್ ಸುರು ಜಾತಾತ್ ಗಜಾಲಿ........

ದೋಗ್ ಕೊಂಕ್ಣಿ ಉಲೊವ್ಪಿ ಸಂಗಿ ಮೆಳ್ಳ್ಯಾರ್

ಪಿಂರ್ಗಿ ಬಾಶೆಂತ್ ಗಾಲ್ತಾಂವ್ ಬುನ್ಯಾದ್

ಆನಿ ದೋಗ್ ತಾಂಕಾ ಸಾಂಗಾತ್ ದಿಲ್ಯಾರ್

ಪಿಂರ್ಗಿ ಬಾಶೆಕ್ ಕರ್ನ್ ಗೆತಾಂವ್ ಪಿಲ್ಯಾದ್

ಕೊಂಕ್ಣಿ ಮ್ಹಜೊ ಜೀವ್, ಕೊಂಕ್ಣಿ ಮ್ಹಜಿ ಬಾಸ್

ಕೊಂಕ್ಣೆಂತ್ಂಚ್ ಜಲ್ಮೊನ್ ವಾಡ್ಲೊಲೊಂ ಹಾಂವ್...

ಮ್ಹಣ್ ಬೊಬೊ ಮಾರೊನ್ ಸಾಂಗ್ಚೆಂ ಸಯ್ತಿ ....

ವಾಟ್ಸಾಪಾರ್ ಆನಿ ತೊಂಡಾ ಭುಕಾರ್

ಕೊಂಗ್ಲೀಷಂತ್ ಜರೊವ್ನ್ಆಸಾತ್ ತಾಂಚಿ ಕೊಯ್ತಿ.......

ಜಾಂವ್ ಆಮ್ಚಿಂ ಕಸಲಿಂ ಕಾರ್ಯಿಂ.‌

ದಿತಾಂವ್ ಆಮಿ ಪಿಂರ್ಗೆಕ್ ಪಯ್ಲೊ ಮಾನ್

ಕೊಂಗ್ಲೀಷ್ ಮದೆಂ ಮದೆಂ ಗುಸೊವ್ನ್

ಕರ್ತಾಂವ್ ಕೊಂಕಣ್ ಮಾಯೆಚೊ ಆಕ್ಮಾನ್

ಕೊಂಕ್ಣೆಂತ್ ಜಲ್ಮೊನ್ ವಾಡ್ಲೆಲಿಂ ಆಮಿ

ಕೊಂಕ್ಣಿ ಬಾಶೆಕ್ ಗೌರವ್ ತರ್ ದಿನಾಂವ್ ....

ಚಿಂತ್ಯಾಂ ಲ್ಹಾನ್ಪಣಾರ್ ಆವಯ್ಚೊ ಪಾಣೊ ಚಿಂವೊನ್

ಆತಾಂ ಆಮಿ ವೊಂಕೊನ್ ಆಸಾಂವ್...

ಉಲಯ್ ತುಂ ಉಲಯ್ ಕೊಂಕ್ಣಿ ಉಲಯ್

ಬುರ್ಗ್ಯಾಂಕ್ ತುಜ್ಯಾ ಕೊಂಕ್ಣಿ ಶಿಕಯ್

ಉರಯ್ ತುಂ ಉರಯ್ ಕೊಂಕ್ಣಿ ಉರಯ್

ತುಜೆಂ ಸ್ಥಾನ್ ಮ್ಹಾನ್ ಕೊಂಕ್ಣೆಂತ್ ಬರಯ್

ಕೊಂಕ್ಣಿ ಆಮ್ಚಿಂ ಮಾಂಯ್ ಬಾಸ್

ಉಲಯ್ ತುಂ ಇಷ್ಟಾ ದಿಸಾಂದಿಸ್

ನಾ ತರ್ ಆನಿ ತೊಡ್ಯಾಚ್ ವರ್ಸಾನಿಂ

ಜಾಂವ್ಕ್ ಆಸ್ತೆಲೆಂ ತಾಚೆಂ ಸರ್ವನಾಶ್...

ಬರೆಯ್ಣಾರ್ : ಸುರೇಶ್ ಸಲ್ಡಾನ್ಹಾ, ಸಕಲೇಶ್ಪುರ್

(ಹೆಂ ಕಾಲ್ಪಣಿಕ್ ಜಾವ್ನಾಸಾ, ಕೊಣಾಯ್ಚ್ಯಾ ಸಿಂತಿಮೆಂತಾಳಾಕ್ ಅನ್ವಯ್ ಜಾಯ್ನಾ, ಆತಾಂಚಿ ಥೊಡಿಂ ಕೊಂಕ್ಣಿ ಕಾರ್ಯಿಂ ಪಳೆತಾನಾ, ತಾಂಚೆ ಉಲೊವ್ಣೆಂ ಆಯ್ಕಾತಾನಾ, ತಾಂಚ್ಯಾ ಬಾಶೆಚೊ ಗುಸ್ಪೊಡ್ ಗೊಂದಾಳೊ ಜಾಲ್ಲೊ ದೆಕ್ತಾನಾ ನಿಜಾಯ್ಕಿ ದುಃಖ್ ಭಗ್ತಾ, ಕಾಳ್ಜಾಕ್ ಬಲಿಯೆಂತ್ ತೊಪ್ಲೆಲ್ಯಾಬರಿ ಜಾತಾ. ತರ್ ಮೊಗಾಚ್ಯಾನೊ ಆಜ್ ಆಮಿ ನಿಚೆವ್ ಎಕ್ ಕರ್ಯ್ಯಾಂ, ಘರಾಂತ್ ಆಮ್ಚ್ಯಾ ಕೊಂಕ್ಣಿ ಉಲೊಂವ್ಯಾ, ಕಾರ್ಯಾನಿಂ ಆಮ್ಚ್ಯಾ ಕೊಂಕ್ಣೆಕ್ ಮಾನ್ ದಿಂವ್ಯಾ, ದೋಗ್ ಜಣ್ ಸಂಗಿ ಮೆಳ್ತಾಂವ್ ತರ್ ಕೊಂಕ್ಣೆಂತ್ ಚ್ ಉಲೊಂವ್ಯಾ..... ಕೊಂಕ್ಣೆಂತ್ ಚ್ ಉಲೊಂವ್ಯಾ.....ಕೊಂಕ್ಣೆಂತ್ ಚ್ ಉಲೊಂವ್ಯಾ. ದೇವ್ ಬರೆಂ ಕರುಂ. ).