ಮಾಂಯ್ಗಾಂವ್ಚೆಂ ಪಾರ್ಸೆಲ್.....

ಮಾಂಯ್ಗಾಂವ್ಚೆಂ ಪಾರ್ಸೆಲ್.....

ಫಾಂತ್ಯಾಫರಾರ್ ಉಟ್ತಾನಾಂಚ್

ಸಂದೇಶ್ ಆಯ್ಲೊ ಇಷ್ಟಾಚೊ

ಪೊರ್ವಾಂ ಯೇವ್ನ್ ಆಸಾಂ ದುಬಾಯ್

ತುಕಾ ಕಿತೆಂ ತರೀ ಹಾಡೊಂಕ್ ಜಾಯ್ ???

ಗಾಂವ್ಚ್ಯಾ ಖಾಣಾಚೊ ಆಬ್ಲೇಶಿ ಹಾಂವ್

ತುರಾಂತ್ ಪಾಟಿಂ ಡಾಡ್ಲೊ ಸಂದೇಶ್

ಜಾತಾ ತರ್ ಯೆತಾನಾ ಹಾಡ್ನ್ ಯೆ

ಲೊಂಣ್ಚೆಂ, ರಗ್ತಿ, ಆನಿ ದುಕ್ರಾಮಾಸ್

ಮ್ಹಣಾಲೊ ಇಷ್ಟ್, ಲಗೇಜ್ ಮ್ಹಜಿ ಆಸಾ ಎಕ್ದಮ್ ಉಣಿ

ಹಾಡ್ತೊಲೊಂ ತುಕಾ ಅಪುಟ್ ದುದಾಚಿ ಲೊಣಿ

ದಾಕ್ಷೆನಾಕಾ ಆನಿ ಕಿತೆಂ ಜಾಯ್ ತರ್ ಸಾಂಗ್ ಮ್ಹಾಕಾ

ಅಂಬೆ, ಪಣಸ್, ಲಾಡು , ಪಸಂದ್ ನ್ಹಯ್ವೆ ತುಕಾ....???

ಇಷ್ಟ್ ಯೆಂವ್ಚೊ ದೀಸ್ ತೊ ಉದೇವ್ನ್ ಯೆತಾನಾ

ಸಕಾಳಿಂ ಥಾವ್ನ್ ಯೆಣ್ಯಾಕ್ ತಾಚ್ಯಾ ರಾಕೊನ್ ರಾವ್ತಾನಾ

ಭಗ್ಲೆಂ ಮ್ಹಾಕಾ ಆಶೆಂಚ್ ಆತುರಾಯ್ ಜಾತಾಲಿ

ಗಲ್ಪಾಥಾವ್ನ್ ಹಾಂವ್ ಗಾವಾಕ್ ವೆತಾನಾ....

ವಿಮಾನ್ ಪಾವೊಂಕ್ ತರ್ ರಾತ್ಚ್ಯಾ ಬಾರಾ ವ್ಹರಾರ್

ತರೀ ಹಾಂವ್ ವ್ಹಚೊನ್ ಪಾವ್ಲೊಲೊಂ ಇಕ್ರಾ ವ್ಹರಾರ್

ಘಡ್ಯೆ ಘಡ್ಯೆ ದೀಷ್ಟ್ ವೆತಾಲಿ ಮ್ಹಜಿ ನಾಮ್ ಫಲಾಕರ್

ಆಶಾ ಜಾತಾಲಿ ನಜರ್ ಗಾಲೊಂಕ್ ಗಾಂವ್ಚ್ಯಾ ಪಾರ್ಸೆಲಾಚೆರ್.

ಇಷ್ಟ್ ಮ್ಹಜೊ ಆಯ್ಲೊ ಗೆವೊನ್ ವ್ಹಡ್ ದೋನ್ ಪೊತಿಂ

ತಾಂತ್ಲ್ಯಾಂತ್ ಎಕ್ ಥಾಂಬಯ್ಲಾಗ್ಲೊ ಮ್ಹಜೆಂ ಹಾತಿಂ

ಆದೇವ್ಸ್ ತಾಕಾ ಮಾಗೊನ್ ದಾವ್ಲೊಂ ಉಟಾಉಟಿಂ

ಕಾರಾಂತ್ ಚ್ ಉಗ್ಡೊಂಕ್ ಲಾಗ್ಲೊಂ ತಾಂತ್ಲಿ ಎಕ್ ಪೊಟ್ಲಿ

ವಾವ್ ಕಸಲೊ ಸ್ವಾದ್ ಮ್ಹಜ್ಯಾ ಮಾಂಯ್ ಗಾಂವ್ಚ್ಯಾ ನಿಸ್ತ್ಯಾಚೊ

ಪೊಟ್ಲಿ ಸುಟಾಯ್ತಾನಾಂಚ್ ವಾಳ್ಳೊ ಪರ್ಮೊಳ್ ದುಕ್ರಾಮಾಸಾಚೊ

ರುಮಾಕ್ ಪಾಂವ್ಚ್ಯಾ ಬಿತರ್ ರುಚ್ ಚಾಕ್ಲಿ ಹಾಡ್ಲ್ಯೆಲ್ಯಾ ಪಾರ್ಸೆಲಾಚೊ

ಉಪ್ಕಾರ್ ಆಟೊಂವ್ಕ್ ಲಾಗ್ಲೊಂ ಪಾರ್ಸೆಲ್ ಹಾಡ್ಲೆಲ್ಯಾ ಇಷ್ಟಾಚೊ...

ಬರೆಯ್ಣಾರ್ : ಸುರೇಶ್ ಸಲ್ಡಾನ್ಹಾ, ಸಕಲೇಶ್ಪುರ್

( ಗಲ್ಪಾಂತ್ ಆಸ್ಲೆಲ್ಯಾ ಆಮ್ಕಾಂ ಗಾವಾ ಥಾವ್ನ್ ಕೊಣಿ ಯೆತಾತ್ ಮ್ಹಣ್ತಾನಾ ಕಿತೆಂ ತರೀ ಘೆವ್ನ್ ಯೆ , ಯಾ ಕಿತೆಂ ತರೀ ಹಾಡ್ಲಾಂಯ್ ಗಿ ಮ್ಹಣ್ ವಿಸರ್ಚೆಂ ಸಹಜ್, ಆಮ್ಕಾಂ ಹಾಂಗಾ ದರಭಸ್ತ್ ಖಾಂವ್ಕ್ ಆಸಾ ತರೀ, ಗಾಂವ್ಚ್ಯಾ ತ್ಯಾ ಮಾಸಾಚೊ ಪರ್ಮೊಳ್ ವಾಳ್ತಾನಾ ಆಮ್ಕಾಂ ಎಕ್ ರೀತಿಚೊ ಆನಂದ್ ಭಗ್ತಾ, ತಶೆಂ ಗಾಂವ್ಚೆ ಪಾರ್ಸೆಲ್ ಯೆತಾನಾ, ಆಮಿ ಆಮ್ಕಾಂಚ್ ವಿಸರ್ತಾಂ. ಬಿ.ಪಿ, ಸುಗರ್, ಕೊಲೆಸ್ಟೊಲ್ ಅಸುಲ್ಲೊ ಸಯ್ತಿ, ದೋನ್ ಪೊಡಿ ಲೊಣ್ಚ್ಯಾಚೊ, ಮಾಸಾಚೊ , ಹ್ಯಾ ಖಾಣಾಂಚೊ ಚಾಕಾನಾಸ್ತಾನಾ ರಾವಾನಾ. ಕಿತ್ಯಾಕ್ ಮಾಂಯ್ಗಾಂವ್ಚ್ಯಾ ತ್ಯಾ ಖಾಣಾಚೊ, ನಿಸ್ತ್ಯಾಚೊ ಸ್ವಾದ್ ಚ್ ವಿಂಗಡ್ ಜಾವ್ನಾಸಾ. )

(PIC credit : Google.com )