ತುಂ ಯೆತೆಲೆಂಯ್ ಮ್ಹಣೊನ್......

ತುಂ ಯೆತೆಲೆಂಯ್ ಮ್ಹಣೊನ್......

ಆಕಾಶಿ ಮೊಳ್ಬಾರ್
ಥಾವ್ನ್ ಪಡ್ಚ್ಯಾ
ಪಾವ್ಸಾ ಥೆಂಬ್ಯಾನಿ
ಮಾಕಾ ಆರೊವ್ನ್
ದರೊಂಕ್ ತುಂ ಯೆತೆಲೆಂಯ್ ಮ್ಹಣೊನ್...

ನಿಳ್ಯಾ ಗಗಾನಾರ್
ಸೊಬ್ಚ್ಯಾ ಪಾವ್ಸಾ ದೊಣಿ ಬರಿ
ಸಾತ್ ರಂಗಾನ್
ಜೀವನ್ ಮ್ಹಜೆಂ
ಸೊಬೊಂಕ್ ಯೆತೆಲೆಂಯ್ ಮ್ಹಣೊನ್.....

ಏಕ್ಸುರ್ ಬಸೊನ್
ತುಜ್ಯಾ ಚಿಂತ್ನಾನಿ
ಬುಡೊನ್ ಅಸ್ತಾನಾ
ದರ್ಯಾಚ್ಯಾ ಲಾರಾನಿಂ
ವೆಂಗೊಂಕ್ ಮಾಕಾ ತುಂ ಯೆತೆಲೆಂಯ್ ಮ್ಹಣೊನ್

ಕಾಳ್ಜಾಚಿ ಉಡಿ
ಜೀವಾಂತ್ ದವೊರೊನ್
ಉಶ್ವಾಸ್ ಜಾವ್ನ್
ಮ್ಹಜೊ ಮೊಗ್
ಕರೊಂಕ್ ತುಂ ಯೆತೆಲೆಂಯ್ ಮ್ಹಣೊನ್

ಖರ್ಕಾಟ್ಯಾ ವೊತಾಕ್
ಕುಡ್ ಹಿ ಮ್ಹಜಿ
ಲಾಸೊನ್ ಆಸ್ತಾನಾ
ಥಂಡಾಯ್ ಕರೊಂಕ್
ಸಾವ್ಳಿ ಜಾವ್ನ್ ತುಂ ಯೆತೆಲೆಂಯ್ ಮ್ಹಣೊನ್

ಜಿಣ್ಯೆಚ್ಯಾ ಪಾವ್ಲಾನಿಂ
ಚಲಾತ್ ವೆತಾನಾ
ಸುಖಾ - ದು:ಖಾಂತ್
ಪಾಯ್ಜಾನಾಂ ಜಾವ್ನ್
ಸಾಂಬಾಳೊಂಕ್ ತುಂ ಯೆತೆಲೆಂಯ್ ಮ್ಹಣೊನ್..

ಕಶ್ಟಾಂಚ್ಯಾ ಮೊಡಾನಿಂ
ಬುಡೊನ್ ಅಸ್ತಾನಾ
ಬುಜ್ವೊಣೆಂಚೆ ಕಿರ್ಣ್ ಜಾವ್ನ್
ಬುಜ್ವೊಣ್ ದಿಂವ್ಕ್
ತುಂ ಯೆತೆಲೆಂಯ್ ಮ್ಹಣೊನ್

ಏಕ್ಸುರ್ಯಾ ಜೀವಾನಾಕ್
ಸಾಂಗಾತಿನಿಕ್ ಆಶೆತಾನಾ
ಜೀಣ್ಯೆ ಪಯ್ಣಾಕ್
ಸಾಂಗಾತ್ ದಿಂವ್ಕ್
ಪತಿಣ್ ಜಾವ್ನ್ ತುಂ ಯೆತೆಲೆಂಯ್ ಮ್ಹಣೊನ್....

✍ ಸುರೇಶ್ ಸಲ್ಡಾನ, ಸಕಲೇಶಪುರ.

ಬರಯ್ಣಾರಾ ವಿಶಿಂ ಜಾಣಾ ಜಾ.

ಸುರೇಶ್ ಸಲ್ಡಾನ್ಹಾ, ಪ್ರಸ್ತುತ್ ಆಭುದಾಬಿಂತ್ ವಾವ್ರ್ ಕರ್ನ್ ಆಸ್ಚೊ ಗೂಂಡ್ ಚಿಂತ್ಪಾಚೊ ಕವಿ. ಮಾಂಯ್ ಗಾಂವಾಂತ್ ಸಕಲೇಶಪುರಾಚೊ. ಪಾಟ್ಲ್ಯಾ ವೀಸ್ ವರ್ಸಾಥಾವ್ನ್ ನವಿ ಮುಂಬಯಾತ್ಲ್ಯಾ ಪನ್ವೆಲಾಂತ್ ಆಪ್ಲ್ಯಾ ಕುಟ್ಮಾ ಸವೆಂ ವಸ್ತಿ ಕರ್ನ್ ಆಸಾ. ಹಾಚಿಂ ವಿಂಚ್ಣಾರ್ ಕವನಾಂ ಮಾಂಯ್ ಭಾಸ್.ಕೊಮ್, ಕೊಂಕ್ಣಿ ಲವ್, ಆಂಕ್ರಿ, ವೀಜ್ ಹಪ್ತ್ಯಾಳೆಂ ತಸಲ್ಯಾ ಜಾಳಿ ಜಾಗ್ಯಾನಿ೦ ಪರ್ಜಳ್ಳ್ಯಾಂತ್ ತರ್, ದಿವೊ, ಕುರೊವ್ ಆನಿಂ ಝೆಲೊ ತಸಲ್ಯಾ ಕೊಂಕ್ಣೆಚ್ಯಾ ಮಾಲ್ಘಡ್ಯಾ ಪತ್ರಾನಿಂ ಫಾಯ್ಸ್ ಜಾಲ್ಯಾಂತ್. ಕಾನಡಿ ಲಿಪಿಂತ್ ವರೆಗ್ ಕವನಾಂ ಬರಯ್ಲೆಲಿ ಹೊಗ್ಳಿಕ್ ಆನಿ ಕೀರ್ತ್ ಹಾಕಾ ಫಾವೊ. ಕೊಂಕಣಿಂತ್ ಆಯ್ಲೆವಾರ್ ಸರಾಗ್ ಬರೊಂವ್ಚ್ಯಾ ಕವಿ/ಲೇಖಕಾಂ ಪಯ್ಕಿ ಎಕ್ಲೊ ಜಾವ್ನಾಸಾ. ಫೇಸ್ ಬುಕ್, ಅಂತರ್ ಜಾಳಿ ಜಾಗೆ ಆನಿ ವಾಟ್ಸಾಪ್ ಪಂಗ್ಡಾಂನಿ ಪ್ರಸ್ತುತ್ ವಿಷಯಾಂ ವಯ್ರ್ ಬರಯ್ತಾ. ಕವಿತಾ ಕಾಮಾ ಶಾಳಾಂನಿ ಚುಕಾನಾಸ್ತಾಂ ಪಾತ್ರ್ ಕಾಣ್ಘೆತಾ. ಆಪುಟ್ ಕೊಂಕಣಿ ಮೊಗಿ ಜಾವ್ನಾಸಾ.

ತುಂ ಯೆತೆಲೆಂಯ್ ಮ್ಹಣೊನ್......

0 comments:

Post a Comment

Translate

ಪಿರ್ಗಜೆಂತ್ಲ್ಯಾ ಖೆಳಾ ಪಂದ್ಯಾಂತ್ ವ್ಹೆಳಾ/