*ಸತಾಕ್ ಕೆದಿಂಚ್ ಮರಣ್ ನಾ*

*ಸತಾಕ್ ಕೆದಿಂಚ್ ಮರಣ್ ನಾ*

ಸಕಲೇಶ್ಪುರ ಮ್ಹಳ್ಯಾ ಶೆರಾಂತ್ಲ್ಯಾ
ಫಾತಿಮಾಪುರ ಮ್ಹಳ್ಯಾ ನಾಡಾಂತ್ಲ್ಯಾ
ಪುಣ್ಯಕೋಟಿ  ಮ್ಹಳ್ಯಾ ಗಾಯ್ರಾಚಿ
ಸಾಂಗ್ತಾ ಹಾಂವ್ ಕಾಣಿ ತಿಚಿ

ಅಂಬ್ಯಾರುಕಾ ಮ್ಹಳಾಂತ್ ಬಸೊನ್
ಗೊವ್ಳಿ ಆಪ್ಲಿ ಪಿಲ್ರುಕ್ ವಾಜೊವ್ನ್
ಅಪಯ್ಲಾಗ್ಲೊ ಗಾಯ್ರಾಂಕ್ ಮೊಗಾನ್
ಅಯ್ಲಿ ಗಾಯ್ರಾಂ ದಾಂವೊನ್ ದಾಂವೊನ್‌

ಸುನಿತಾ ಯೆಗೊ, ಅನಿತಾ ಯೆಗೊ,
ಸವಿತಾ ಯೆಗೊ, ಕವಿತಾ ಯೆಗೊ.
ಬಬಿತಾ ಯೆಗೊ, ಸಬಿತಾ ಯೆಗೊ
ಪುಣ್ಯಾ ಕೋಟಿ ತುಂ ಯಿ ದಾಂವೊನ್ ಯೆಗೊ

ಆಪ್ಲ್ಯಾ ಗೊವ್ಳಾಚ್ಯಾ ಉತ್ರಾಕ್ ಮಾನ್ವೊನ್
ವೊಂತಿಯೆಂತ್ ಅಪ್ಲಾ ದುದ್ ಗೆವೊನ್
ಗಾಯ್ರಾಂ ಅಯ್ಲಿ ರುಕಾಚ್ಯಾ ಮ್ಹಳಾಕ್
ಅಪ್ಲ್ಯಾ ಗೊವ್ಳಾಚಿ ಮೊಡ್ಕಿ ಬರ್ಚ್ಯಾಕ್

ಕುಶಿಲ್ಯಾ ರಾನಾಂತ್ಲೊ ವಾಗ್
ಹಪ್ತೊಬರ್ ಅಸ್ಲೊಲೊ ಭುಕೆನ್,
ಪಯ್ಶಿಲ್ಯಾ ಗಾಯ್ರಾಂಕ್ ಪಳೆವ್ನ್
ಲಾಳ್ ದೆವಾತ್ ಲಾಗ್ಲೊ  ಆಶೆನ್

ಭುಕೆಲ್ಯಾ ವಾಗಾಕ್ ಪಳೆವ್ನ್
ದಾವೊಂಕ್ ಲಾಗ್ಲಿಂ ಗಾಯ್ರಾಂ
ಉಡೊನ್ ಪಡೊನ್ ರಾನಾ ಕುಶಿನ್
ಅಪ್ಲ್ಯಾ ಜಿವಾಚಿ ಆಶಾ ಸಾಂಡೊನ್..

ಗೊಟ್ಯಾಂತ್ಲ್ಯಾ ಬಾಳ್ಶ್ಯಾಚೊ
ಉಗ್ಡಾಸ್ ಕಾಡೊನ್...
ಪುಣ್ಯಾ ಕೋಟಿ ಮ್ಹಳ್ಳಿ ಗಾಯ್
ದಾವೊಂಕ್ ಲಾಗ್ಲಿ ಗೊಟ್ಯಾ ತೆವ್ಶಿನ್

ಭುಕೆಲ್ಯಾ ಮ್ಹಾಕಾ ಖಾಣ್ ಜಾಲೆಂ
ಮ್ಹಣಾತ್ ಚಿಂತೊನ್ ವಾಗ್
ಉಡ್ಲೊ ಪುಣ್ಯಾ ಕೋಟಿ ತೆವ್ಶಿನ್
ಹಾಸಾಲಾಗ್ಲೊ ತಿಕಾ ಪಳೆವ್ನ್

ಪೊಟ್ ತುಜೆಂ ಚಿರೊನ್
ಜಿವೆಶಿ ತುಕಾ ಮಾರೊನ್
ರಗತ್ ತುಜೆಂ ಪೀಯೆವ್ನ್
ಗಿಳ್ತೊಲೊಂ ತುಕಾ ಏಕಾಚ್ ಘಾಸನ್ .....

ಭುಕೆಲ್ಲ್ಯಾ ವಾಗಾ, ಆಯ್ಕ್
ಮ್ಹಜಿ ಏಕ್ ಖಾಲ್ತಿ ವಿನಂತಿ
ಪುತ್ ಮ್ಹಜೊ ಆಸಾ ರಾಕತ್
ದುದಾಕ್ ದೀಸ್ ಅನಿ ರಾತಿಂ

ವೆಗಿಂಚ್ ವ್ಹಚೊನ್ ದುದ್ ದೀವ್ನ್
ಯೆತಾ ಹಾಂವ್ ಪಾಟಿಂ
ಉಪ್ರಾಂತ್ ಖಾವ್ನ್ ಮ್ಹಾಕಾ
ಥಾಂಬಯ್ ಭುಕ್ ತುಜಿ..

ಭುಕೆಲ್ಯಾ ವೆಳಾರ್ ಮ್ಹೆಳ್ಯಾಂಯ್ ಮ್ಹಾಕಾ
ಕೆದಿಂಚ್ ವಚೊಂಕ್ ಸೊಡ್ಚೊನಾ ತುಕಾ
ಚುಕಾರಿ ಮಾರ್ನ್ ದಾಂವ್ಶಿ ತರ್
ಜಿಯೆಂವ್ಕ್ ದಿಂವ್ಚೊನಾ ತುಕಾ

ಸತಚ್ ಮ್ಹಜಿಂ ಅವಯ್ - ಭಾಪಯ್
ಸತಚ್ ಮ್ಹಜಿಂ ಸ್ಯೆರ್ರಿಂ - ದ್ಯೆರ್ರಿಂ
ಸತಾಕ್ ವಿಸ್ರೊನ್ ಗೆಲಿಂ ತರ್
ಮೆಚ್ವೊಂಚೊ ನಾ ಸರ್ಗಿಂಚೊ ಭಾಪ್

ಭುಕೆಲ್ಲ್ಯಾ ವಾಗಾಕ್ ಭಾಸ್ ದೀವ್ನ್
ಅಯ್ಲಿಂ ಬಾಳಾ ತುಕಾ ಪಳೆಂವ್ಕ್
ದುದ್ ಪುರಾ ಪಿಯೆ ಪುಸೊನ್
ಆನಿ ಮುಕಾರ್ ತುಕಾ ನಾ ಮೆಳಾನ್

ಮಾಂಯ್ ತುಂ ಕಿತ್ಯಾಕ್ ವೆತಾಯ್ ?
ವಾಗಾಕ್ ಕಿತ್ಯಾಕ್ ಖಾಣ್ ಜಾತಾಯ್ ?
ಅನಾಥ್ ಕರೊನ್ ವಚನಾಕ
ಮ್ಹಣಾಲೊ ಪುತ್ ಅಪ್ಲಾ ಅವಯ್ಕ್...

ಕೊಣಾಚೆಂ ದುದ್ ಹಾಂವ್ ಪಿಯೆಂವ್..?
ಕೊಣಾಕ್ ಮಾಂಯ್ ಮ್ಹುಣ್ ಅಪೊಂವ್..?
ಕೊಣಾಚ್ಯಾ ಪಾಸ್ಳೆಂತ್ ಹಾಂವ್ ನಿದುಂ .. ?
ತುಜ್ಯಾವಿಣೆ ಕೊಣ್ ಅಸಾತ್ ಮ್ಹಾಕಾ.... ?

ದಿಲ್ಯಾ ಉತ್ರಾಕ್ ಚುಕ್ಚಿನಾ.
ಪಾಡ್ ಚಿಂತ್ಪಾಕ್ ಭುಲ್ಚಿನಾ
ಖರೆಂಚ್ ಪಾಟಿ ವೆತೆಲಿಂ
ವಾಘಾಕ್ ಖಾಣ್ ಜಾತೆಲಿ......

ಬಾವಾನೊ, ಭಯ್ಣಿನೊ
ಮ್ಹಜ್ಯಾ ಮೊಗಾಚ್ಯಾನೊ
ತುಂಮ್ಚೊ ಪುತ್ ಮ್ಹಣ್ ಲೆಕುನ್ ...
ಅನಾಥ್ ಜಾಂವ್ಕ್ ತಾಕ ಸೊದಿನಾಕತ್....

ಮುಖ್ಲ್ಯಾನ್ ಅಯ್ಲಾರ್ ಹಾಂಡಿನಾಕತ್
ಪಾಟ್ಲ್ಯಾನ್ ಗೆಲ್ಯಾರ್ ಗುಡ್ಡೆಯ್ನಾಕತ್
ತುಂಮ್ಚೆಂಚ್ ಬಾಳ್ ಮ್ಹಣ್ ಚಿಂತೊನ್
ಘೆವ್ನ್ ನಿದಾ ತಾಕಾ ತುಂಮ್ಚೆ ಪಾಸ್ಳೆಂತ್

ಅನಾಥ್ ಜಾಲೊಯ್ ಬಾಳಾ
ವಾಗಾಕ್ ಖಾನ್ ಜಾಂವ್ಕ್ ಯೆತಾ
ಮ್ಹಣಾತ್ ಪುತಾಕ್ ಮೊಗಾನ್ ವೆಂಗಾತ್
ಸೊದಿತ್ ಗೆಲೆಂ ವಾಗಾಕ್ ರಾನಾಂತ್

ಬಗ್ಲೆಚ್ಯಾ ನಂಯ್ತ್ ನಾವ್ನ್
ವಾಗಾಚ್ಯಾ ಬಿಲ್ಯಾ ಕಡೆ ಯೇವ್ನ್
ವೆಳ್ ವಿಬಾಡಿನಾಸ್ತಾನಾ
ವಾಗಾಕ್ ಸಾಂಗಾಲಾಗ್ಲೆಂ ಮೊಗಾನ್......

ಹಾಡಾಂ ಅಸಾತ್ , ಮಾಸ್ ಅಸಾ,
ಕುಡಿಂತ್ ಉಣುನಿ ರಗತ್ ಅಸಾ
ಅಸುಲ್ಲೆಂ ಪುರಾ ಖಾವ್ನ್
ಥಾಂಬಯ್ ವಾಗಾ ಬುಖ್ ತುಜಿ...

ಪುಣ್ಯಾ ಕೋಟಿಚೆಂ‌ ಉತರ್ ಅಯ್ಕೊನ್,
ವಾಗ್ ದೊಳ್ಯಾಂತ್ಲಿ ಬರುಲ್ಲಿಂ ದು:ಖಾಂ ಪುಸೊನ್,
ಸತ್ತಿ ತುಕಾ ಮಾರ್ನ್ ಕಾಯ್ನ್ ತರ್
ಮೆಚ್ವೊಂಚೊ ನಾ ಸರ್ಗಿಂಚೊ ಬಾಪ್

ಮ್ಹಜೆಂ ಮೊಗಾಚೆಂ ಭಯ್ಣ್ ತುಂ
ಸತಾಕ್ ತುಜ್ಯಾ ಮೆಚ್ವಾಲೊಂ
ತುಕಾ ಹಾಂವ್ ಖಾಂವ್ಚೊನಾ
ತುಕಾ ಬಾದಕ್ ಕರ್ಚೊನಾ....

ದೆವಾಚೆಂ ನಾಂವ್ ಕಾಡೊನ್
ಸಗ್ಳಾನಿತ್ಲಾನ್ ದೀಷ್ಟ್ ಗುಂವ್ಡೊವ್ನ್
ವಯ್ರ್ ಥಾವ್ನ್ ಸಕ್ಲಾ ಉಡೊನ್
ಜೀವ್ ಹೊಗ್ದಾಯ್ಲೊ ವಾಗಾನ್

ಪುಣ್ಯಾ ಕೋಟಿ ಅಯ್ಲೆಂ ದಾಂವೊನ್
ವೆಂಗೊಂಕ್ ಲಾಗ್ಲೆ  ಬಾಳಾಕ್ ಕುಶೆನ್
ದ್ಯೆರಾನ್ ಸಾಂಗೊಂಕ್ ಲಾಗ್ಲೆಂ ಭಯ್ಣ್ಯಾಂಕ್
ಸತಾಕ್ ಕೆದಿಂಚ್ ಮರಣ್ ನಾ ಮ್ಹಣೊನ್......

*ಕೊಂಕ್ಣೆಕ್ : ಸುರೇಶ್ ಸಲ್ಡಾನ್ಹಾ ಸಕಲೇಶ್ಪುರ್ (ಪನ್ವೆಲ್..)*
*ಕನ್ನಡ : ಪುಣ್ಯಕೋಟಿ (ದರಣಿ ಮಂಡಳ ಮದ್ಯಾದೊಳಗೆ)
ಮೂಳ್ ಬರೊವ್ಪಿ ಕವಿ : ಬಿ.ಎಂ.ಶ್ರೀ