ರಾಕೊನ್ ತುಕಾ ಆಸಾಂ....

ಆಕಾಶಿ ಮೊಳ್ಬಾರ್

ಥಾವ್ನ್ ಪಡ್ಚ್ಯಾ

ಪಾವ್ಸಾ ತೆಂಬ್ಯಾನಿ

ತುಂ ಯೆತೆಲೆಂಯ್ ಮ್ಹಣೊನ್.....

ನಿಳ್ಯಾ ಗಗಾನಾರ್

ಸೊಬ್ಚ್ಯಾ ಕಾಮನ ಬಿಲ್ಲು ಬರಿ

ಸಾತ್ ರಂಗಾನ್

ಜೀವನ್ ಮ್ಹಜೆಂ 

ಸೊಬೊಂಕ್ ಯೆತೆಲೆಂಯ್ ಮ್ಹಣೊನ್.....

ಎಕ್ಸುರೊ ಬಸೊನ್

ತುಜ್ಯಾ ಚಿಂತ್ನಾನಿ

ಬುಡೊನ್ ಆಸ್ತಾನಾ

ದರ್ಯಾಚ್ಯಾ ಲಾರಾನಿಂ

ತುಂ ಮಾಕಾ ವೆಂಗೊಂಕ್ ಯೆತೆಲೆಂಯ್ ಮ್ಹಣೊನ್

ಕಾಳ್ಜಾಚಿ ಉಡಿ

ಜಿವಾಂತ್ ದವೊರೊನ್

ತುಜೊ ಮೋಗ್ ಕರುಂಕ್ 

ಉಸ್ವಾಸ್ ಜಾವ್ನ್ ತುಂ ಯೆತೆಲೆಂಯ್  ಮ್ಹಣೊನ್.....

ಕರ್ಕಾಟ್ಯಾ ವೊತಾಕ್

ಕರ್ಪೊನ್ ಆಸ್ತಾನಾ

ಥಂಡಾಯ್ ದಿಂವ್ಕ್ 

ಸಾವ್ಳಿ ಜಾವ್ನ್ ತುಂ ಯೆತೆಲೆಂಯ್ ಮ್ಹಣೊನ್...

ಜಿಣ್ಯೆಚ್ಯಾ ಪಾವ್ಲಾನಿಂ

ಚಲಾತ್ ವೆತಾನಾ

ಪಾಯ್ಜಾಣಾ ಜಾವ್ನ್

ತುಂ ಸಾಂಬಾಳೊಂಕ್ ಯೆತೆಲೆಂಯ್  ಮ್ಹಣೊನ್...

ಕಶ್ಟಾಂಚ್ಯಾ ಮೊಡಾನಿಂ

ಬುಡೊನ್ ಆಸ್ತಾನಾ

ಭುಜ್ವೊಣೆಚೆ ಕೀರ್ಣ್

ಜಾವ್ನ್  ತುಂ ಯೆತೆಲೆಂಯ್ ಮ್ಹಣೊನ್...

ಎಕ್ಸುರ್ರ್ಯಾ ಜೀವಾನಾಕ್

ಸಾಂಗಾತಿಣ್ ಆಶೆತಾನಾ

ಹಾತಾಕ್ ಹಾತ್ ಧರೊನ್

ಆಧಾರ್  ಜಾಂವ್ಕ್ ತುಂ ಯೆತೆಲೆಂಯ್ ಮ್ಹಣೊನ್......

 :- ಸುರೇಶ್ ಸಲ್ಡಾನ್, ಪನ್ವೆಲ್ ಅಬುಧಾಬಿ

Published in  :  Aankri .com