ಆಮ್ಚೆಂ ಲಾನ್ಪೊಣಾಲೆ ದೀಸ್....

ಆಮ್ಚೆಂ ಲಾನ್ಪೊಣಾಲೆ ದೀಸ್....

ಕಚ್ಚಾ ಪಾಡಿಂತ್ ಕಾಜು ಚೊರ್ನ್

ಚಡ್ಡೆ ಬಿತರ್ ಲಿಪೊನ್ 

ಹಾಡ್ನ್ ತುಕಾ ದಿತಾನಾ

ಮಾಂಯ್ಚೆ ಗಾಳಿ ಆಯ್ಕಾಲ್ಲೆ ತೆ ದೀಸ್

ಜಾಂಮ್ಳಾಚ್ಯಾ ರುಕಾರ್ ಚಡೊನ್

ಜಾಂಮ್ಳಾ ಕಾಡೊಂಕ್ ವೆತಾನಾ

ಪಾಂಟೊ ಮೊಡೊನ್ ಸಕ್ಲಾ ಪಡ್ತಾನಾ

ತುಂವೆಂ ಮೊಗಾನ್ ಆರೊವ್ನ್ ಧರುಲ್ಲೆ ತೆ ದೀಸ್

ಪೆರಾಂ ಕಾಡುಂಕ್ ತೆಂಕ್ಡಿ ವರ್ತಾನಾ

ವೊಂಯ್ಚ್ಯಾ ಕಾಂಟ್ಯಾಂಕ್ ಸಿರ್ಕೊನ್

ಗಾಗ್ರೊ ತುಜೊ ನಿಸರ್ತಾನಾ

ಸೆಜಾರ್ಚ್ಯಾ ಆಲಿಸ್ ಬಾಯೆನ್ ದುಬಾವ್ ಕೆಲ್ಲೆ ತೆ ದೀಸ್..

ಗೊರ್ವಾಂಕ್ ಚರೊಂಕ್ ಸೊಡುನ್

ಮೆರೆರ್ ನಿದೊನ್ ಸಪ್ಣಾ ದೆಕ್ತಾನಾ

ಗೊರ್ವಾನಿ ಗಾದ್ಯಾಂತ್ಲೆಂ ಬಾತ್ ಖೆಲ್ಲ್ಯಾಕ್ 

ಮಾಪ್ಳ್ಯಾನ್ ಆಮ್ಕಾಂ ದಾಂವ್ಡೊನ್ ಹಾಡುಲ್ಲೆ ತೆ ದೀಸ್

ಕಣ್ಣಾಮುಚ್ಚೆ ಕಾಡೆ ಕೊಡೆ ಖೆಳ್ ಖೆಳೊಂಕ್ 

ಕುಂಕ್ಡಾ ಗುಡಾಂತ್ ಲಿಪೊನ್ ಬಸ್ತಾನಾ

ಡಿವ್ಡಾಕ್ ಪಳೆವ್ನ್ ಧಾಂವೊನ್ ಯೇವ್ನ್

ಗಾಲಾಕ್ ಮ್ಹಜ್ಯಾ ಕೀಸ್ ದಿಲ್ಲೆ ತೆ ದೀಸ್..

ಆಂಬೊ ಕಾಡುಂಕ್ ರುಕಾರ್ ಚಡ್ತಾನಾ

ಉಂಬ್ಲೆ ಚಾಬೊನ್ ಅಂಗ್ ದಾಡ್ಕೆತಾನಾ

ತೇಲ್ ಪುಸೊನ್, ಉದ್ಕಾಂತ್ ಶೆಕ್ ದಿಂವ್ಚ್ಯಾ ವಗ್ತಾ

ಬಾಬಾಚೆ ಚಿಂಚೆಚ್ಯಾ ಆಡರಾನ್ ಮಾರ್ ಖೆಲ್ಲೆ ತೆ ದೀಸ್..

ಪಾದ್ರಿ ಉಬಿ ದೊತೊರ್ನ್ ವಿಚಾರ್ತಾನಾ

ಪಾಟ್ಲ್ಯಾನ್ ರಾವೊನ್ ತುಂವೆ ಶಿಕೊನ್ ದಿತಾನಾ

ಪಾದ್ರಾಬಾಕ್ ರಾಗ್ ಯೇವ್ನ್ ಆಮ್ಕಾಂ ದೊಗಾಂಯ್ಕಿ 

ಕೇಸ್ ದರ್ನ್ ಮಾಂಡೊ ವೊಣೊದಿಕ್ ಮಾರುಲ್ಲೆ ತೆ ದೀಸ್..

ಫಿರ್ಗಜೆಚ್ಯಾ ಪೆಸ್ತಾ ದಿಸಾ ಬಾಬಾಚೆ ಪಯ್ಶೆ ಚೊರ್ನ್

ಇಗರ್ಜೆಚ್ಯಾ ತೊರಿ ಲಾಗಿ ಎಕಾಮೆಕಾ ಐಸ್ ಕ್ರಿಮ್ ಖಾತಾನಾ

ಬಾಬಾಚ್ಯಾ ಭಿಂಯಾಕ್ ಲಾಗೊನ್ ಆಮಿ ಲಿಪೊನ್ ಬಸೊಂಕ್ ವೆಚ್ಯಾ ವಗ್ತಾ..

ತೆರೆಜ್ ಬಾಯೆಚ್ಯಾ ಕೊಲ್ಗ್ಯಾನ್ ದಾಂವ್ಡೊನ್ ಹಾಡುಲ್ಲೆ ತೆ ದೀಸ್...

ಲಾನ್ಪೊಣಾಲೆ ತೆ ದೀಸ್ ಚಿಂತಾನಾ ದುಖಾಂ ಭರ್ತಾತ್ ದೊಳ್ಯಾನಿಂ

ಲಗೊರಿ, ಕುಟ್ಟಿ ದೊಣ್ಣೊ, ಚೌಕಾಬರೆ ಅಸಲ್ಯಾ ಖೆಳಾನಿಂ

ಲಾನ್ಪೊಣ್ ಮಾಜ್ವೊನ್ ಗೆಲೆಂ, ಪರತ್  ಮೆಳಾನಾ ಆನಿಂ

ಕಾಳಿಜ್ ಆಶೆತಾ  ಆಜುನಿ ಜಿಯೆಂವ್ಕ್ ಲಾನ್ಪೊಣಾಚ್ಯಾ ಉಗ್ಡಾಸಾನಿಂ...

 : - ಸುರೇಶ್ ಸಲ್ಡಾನ್, ಪನ್ವೆಲ್ ಅಬುಧಾಬಿ

Published in  :  Aankri .com