ಕೊಂಬ್ಯಾಕಾಟ್

ತೆ ಎಕಾಚ್ಚ್ ಕಾಸ್ತಾಚೆ

ತೆ ಎಕಾಚ್ಚ್ ಜಾತಿಚೆ

ತೆ ಎಕಾಚ್ಚ್ ರಿತಿಚೆ

ತೆ ಎಕಾಚ್ಚ್ ಮಾಪಾಚೆ

ಎಕಾಚ್ಚ್ ಗುಡಾಂತ್ ರಾವೊನ್

ಎಕಾಚ್ಚ್ ಬೊಶಿಯೆಂತ್ ಖಾವ್ನ್

ಎಕಾಚ್ಚ್ ಮೊಡ್ಕೆಂತ್ ಪಿಯೆವ್ನ್

ತೆ ವ್ಹಡ್ ಜಾಲ್ಲೆ ಎಕಾಚ್ಚ್ ಆವಯ್ಚೆ ಮೊಗಾನ್

ಗಿರಾಕಿ ಆಯ್ಲೆ ಕಾರಾಂನಿ

ಎಕ್ಲ್ಯಾನ್ ಎಕ್ಲ್ಯಾಕ್ ವಿಂಚ್ಲೊ

ದುಸ್ರ್ಯಾನ್ ಆನ್ಯೇಕಾಕ್ ವಿಂಚ್ಲೊ

ಝಗ್ಡಾಂವ್ಕ್ ಗಾಂವ್ಚ್ಯಾ ಕೊಂಬ್ಯಾಕಾಟಾಂನಿ

ಗಾಂವ್ಚ್ಯಾ ಲೊಕಾಕ್ ತಮಾಸೊ

ಜೀವ್ ವೆತಾ ಕೊಂಬ್ಯಾಂಚೊ

ಝಗ್ಡೆಂ-ಖೆಳ್ ಮನೋರಂಜನಾಚೊ

ಲೊಕಾಂ ಮಧೆಂ ಸಯ್ತ್ ಪಂಗಡ್ ಜಾಲೊ

ಎಕಾಚ್ಚ್ ಗುಡಾಂತ್ ವಾಡ್‍ಲ್ಲೆ

ಕೊಂಬೆ ತೆ ಝುಗ್ಡುನ್ ಪಡ್ಲೆ

ಎಕಾಚ್ಚ್ ಉಬೆನ್ ಭಾಯ್ರ್ ಆಯಿಲ್ಲೆ

ತೆ ಸಾಂತೆಂತ್ ಆಜ್ ಮೊರೊನ್ ಪಡ್ಲೆ

ಕೊಂಬ್ಯಾಂಕ್ ತರೀ ಮನ್ ನಾ

ಲೊಕಾಂಕ್‍ಯೀ ಕಿತೆಂ ಗತ್ ನಾ?

ಕೊಂಬೆ ಮೊರೊನ್ ಗೆಲ್ಯಾರೀ

ಆತಾಂ ಲೊಕಾನ್ ಎಕಾಮೆಕಾ ಝಗ್ಡುಂಕ್ ಧರ್ಲೆಂ

ಕೊಣಾಖಾತಿರ್ ಕೋನಣ್ ಝುಜ್ಲೆ

ಬೊಲ್ತ್ಯಾಚೆ ಜೀವ್ ತೆ ಉಬ್ಲೆ

ಕೊಣಾಚ್ಯಾ ಘರ್ಚೆ ನಳೆ ಫುಟ್ಲೆ

ಕಿತ್ಲೆಶಾ ಘರ್ಚೆ ದಿವೆ ಪಾಲ್ವಾಲೆ

ಎಕಾಚ್ಚ್ ಗಾಂವಾಂತ್ ವಾಡ್‍ಲ್ಲೆ

ಎಕಾಚ್ಚ್ ಇಸ್ಕೊಲಾಂತ್ ಶಿಕ್‍ಲ್ಲೆ

ಎಕಾಚ್ಚ್ ಬಾಂಯ್ಚೆ ಉದಕ್ ಪಿಯೆಲ್ಲೆ

ಆಜ್ ಎಕಾಮೆಕಾಕ್ ದುಸ್ಮಾನ್ ಜಾಲ್ಲೆ!!

 : - ಸುರೇಶ್ ಸಲ್ಡಾನ್, ಪನ್ವೆಲ್ ಅಬುಧಾಬಿ

Published in :  Maibhaas.com