ಸಾಂಗ್ ಮ್ಹಾಕಾ ಸಾಂಗ್

ಸಾಂಜೆಚ್ಯಾ ವ್ಹೆಳಾರ್  ಎಕ್ಸುರೊ

ಬೊಸೊನ್ ಆಸ್ತಾನಾ

ವಾಟ್ಸುರ್ಯಾಬರಿ ಯೆವ್ನ್

ದಾರಾರ್ ರಾವ್ಲೆಂಯ್

ನಯನಾಂಕ್ ನಯನಾ ಬೆಟ್ತಾನಾ

ಮೊಬಾಯ್ಲ್ ಸಂಕೊ ದೀವ್ನ್

ದಾಂವಾತ್ ಗೆಲೆಂಯ್

ಅಂದ್ಕಾರಾಂತ್ ಬುಡುಲ್ಲ್ಯಾ ಮ್ಹಾಕಾ

ದಿವ್ಟೊಣಿ ಜಾಂವ್ಕ್ ಪಾವ್ಲೆಂಯ್

ಮೋಗ್ ನೆಣಾರಿ ಜಾಲ್ಲ್ಯಾ ಮ್ಹಾಕಾ

ಮೊಗಾಚೆಂ ಲಿಸಾಂವ್ ಶಿಕಯ್ಲೆಂಯ್

ದೀಸ್ ರಾತ್ ತುಕಾ ರಾಕೊನ್

ರಾವಾಶೆಂ ಕೆಲೆಂಯ್

ಹಾಸೊನ್ ಹಾಸೊನ್ ಕಾಳ್ಜಾಂತ್

ಮಜ್ಯಾ ಜಾಗೊ ಘೆತ್ಲೊಯ್

ದೀಸ್ ವ್ಹೆತಾ ವ್ಹೆತಾಸ್ತಾನಾ

ಉಲೊಣೆಂ ತುಂವೆಂ ಉಣೆಂ ಕೆಲೆಂಯ್

ನಿಬಾ ವಯ್ರ್ ನಿಬಾಂ ದೀವ್ನ್

ಚುಕಾರಿ ಮಾರಿತ್ ಗೆಲೆಂಯ್

ಭಲಾಯ್ಕೆಚೆಂ ನೀಬ್ ದೀವ್ನ್

ವೆಗ್ಗಿಂ ನಿದೊಂಕ್ ಲಾಗ್ಲೆಂಯ್

ಹರ್ಯೆಕ್ ಘಡಿ ತುಕಾ ನಿಯಾಳುನ್

ರಡ್ಚ್ಯಾ ಬರಿ ಕೆಲೆಂಯ್

ಸಾಂಗ್ ಮ್ಹಾಕಾ ಸಾಂಗ್

ಆಜ್ ಪುಣೀ ಸಾಂಗ್ ಮೊಗಾ

ಕಸಲ್ಯಾ ಪಾತ್ಕಾಕ್ ಮ್ಹಾಕಾ

ಅಸಲಿ ಸಜಾ ದಿಲಿಯ್..?

ಮೊಗಾಚೆ ಲಿಸಾಂವ್ ಶಿಕೊನ್

ಆತಾಂ ಖಂಯ್ಸರ್ ಲಿಪ್ಲಾಂಯ್..?

ಖರೊ ಮೋಗ್ ಕೆಲ್ಲ್ಯಾಕ್ ಕಸಲೆಂ

ಇನಾಮ್ ತುಂವೆ ದಿಲೆಂಯ್..

ದೀಸ್ ಅನಿ ರಾತ್ ತುಕಾಚ್

ನಿಯಾಳುನ್ ಆಸಾ

ಹರ್ಯೆಕ್ ಮಿನುಟಾನಿಂ ಮೊಬಾಯ್ಲಾ

ವಯ್ರ್ ದೀಶ್ಟ್ ಗಾಲ್ನ್ ಆಸಾಂ

ಮನ್ ತುಜೆಂ ಬದ್ಲೊನ್ ಫೊನ್

ಮ್ಹಾಕಾ ಕರ್ತಾಯ್ ಮ್ಹಣ್

ಆಶೆಚೆಂ ಕೀರ್ಣ್ ಕಾಳ್ಜಾಂತ್ ಮ್ಹಜ್ಯಾ 

ಜಳೊವ್ನ್ ತುಕಾ ರಾಕತ್ ಆಸಾಂ!

: - ಸುರೇಶ್ ಸಲ್ಡಾನ್, ಪನ್ವೆಲ್ ಅಬುಧಾಬಿ 

Published in  :  Aankri .com