ಕೊರೊನಾ....ಹಾತಾಂತ್ ಪಯ್ಸೊ ನಾ ..

ಕೊರೊನಾ....ಹಾತಾಂತ್ ಪಯ್ಸೊ ನಾ ..

ಕಿತೆಂ ಜಾಲೆಂ‌ ಕಳಾನಾ ಹ್ಯಾ ಸಂಸಾರಾಕ್

ಕೊಣೆ ಡಾಡ್ಲೆಂ‌ ‌ನ್ಹೆಣಾಂ ಹ್ಯಾ ಕೊರೊನಾಕ್

ಲೋಕ್ ಸಗ್ಳೆ ಹ್ಯಾ ಪಿಡೆಕ್ ಥರ್ಥಲ್ಲ್ಯಾತ್

ಬೊಲ್ಸಾನಿಂ ಅಸ್ಲೆಲೆ ಪಯ್ಶೆ ಖಾಲಿ‌ ಜಾಲ್ಯಾತ್

ಕೊರೊನಾ ವರ್ವಿ ಸಬಾರಾಂಕ್ ಜೆವಣ್ ನಾ

ಲೊಕ್ ಡೌನಾ ವರ್ವಿಂ ಸಬಾರಾಂಕ್ ಕಾಮ್ ನಾ

ಸಮಾದಾನೆನ್ ಬಸೊಂಕೀ ಉಪಾಯ್ ನಾ

ಸದಾಂಚ್ಯಾ ಖರ್ಚಾಕ್ ಹಾತಿಂ ಪಯ್ಸೊ ನಾ

ಥೊಡೆ ಕೊರೊಡಾನಿ ಪುಂಜೊಂವ್ಕ್ ಲಾಗ್ಲೆ

ದುಬ್ಳಾಂಕ್ ಪಳೆವ್ನ್ ಕಾಂಟಾಳುಂಕ್ ಲಾಗ್ಲೆ

ತಾಂಚೆ ಪಯ್ಶೆ ಬ್ಯಾಂಕಾನಿ ಕುಸೊಂಕ್ ಲಾಗ್ಲೆ

ತರೀ ಕಿತೆಂಚ್ ಉಪ್ಕಾರಾಕ್ ನಾ ಪಡ್ಲೆ...

ಸಂಸಾರಾಚಿ ಅರ್ಥಿಕ್ ಸ್ಥಿತಿ ಸಗ್ಳಿಚ್ ಬಿಗಾಡ್ಲ್ಯಾ

ವಿಮಾನ್ ಬಸ್ಸ್, ವಾಹಾನಾಂಕ್ ಕಲ್ಯೆ ಲಾಗ್ಲ್ಯಾ

ಕೊರೊಡಾನಿಂ ಲೋಕ್ ಕಷ್ಟಾರ್ ಪಡ್ಲಾ

ಚಾರ್ ವೊಣೊದಿ ಬಿತರಚ್ ಸಾಂಪಾಡ್ಲಾ

ಗಲ್ಪಾಂತ್ಲೆ ಸರ್ವ್ ವಾಟೊ ದಾಂಪ್ಲ್ತಾತ್

ಸಬಾರಾಂಚಿ ಕಾಮಾ ವಚೊಂಕ್ ಲಾಗ್ಲ್ಯಾತ್

ತೆಣೆ ದರ್ಯೊ, ಹೆಣೆ ರೆಂವ್ ಜಾಲ್ಯಾ ಪರಿಸ್ಥಿತಿ

ದೋನ್ ಹಜಾರ್ ವೀಸ್ ಘೆವ್ನ್ ಅಯ್ಲಾಂ ಪನೊತಿ

ಸಂಸಾರಾರ್ ಅಸಾತ್ ಸಭಾರ್ ವಿಜ್ಞಾನಿಂ‌

ಬುಡೊನ್ ಅಸ್ತಾತ್ ನವ್ಯಾ ಸೊದ್ನಾನಿಂ

ಕೊರೊನಾಕ್ ವಕತ್ ಮೆಳೊಂಕ್‌ ನಾ ಅಜುನಿ

ಕ್ಯೆದ್ ಜಾವ್ನಾಸಾಂವ್ ಆಮ್ಚ್ಯಾಚ್ ಘರಾನಿಂ

ದೆವಾ ಬಾಪಾ ತುಜ್ಯಾ ಭುರ್ಗ್ಯಾಂಚೆ ಮಾಗ್ಣೆಂ ಆಯ್ಕ್

ಆಜ್ಣಾ ದಿ ಹಿ ಪಿಡಾ ಸಂಪೂರ್ಣ್ ಥರಾನ್ ನಾಸ್ ಜಾಂವ್ಕ್

ಸಂಸಾರಿ ಪರ್ಜಾ ತುಜೆಂ ಉತಾರ್ ಆಯ್ಕೊಂಕ್‌

ಅತಾಂ ಪುಣಿ ಮಾಯಾಮೊಗಾನ್ ಜಿಯೆಂವ್ಕ್

✍ *ಸುರೇಶ್ ಸಲ್ಡಾನ್ಹಾ, ಸಕಲೇಶ್ಪುರ*