ಎಕಾ ಜಳ್ಚ್ಯಾ ವಾತಿಚೆ ರುದಾನ್......

ಎಕಾ ಜಳ್ಚ್ಯಾ ವಾತಿಚೆ ರುದಾನ್......

ಕೊಲ್ವಾಚ್ಯಾ ಘರಾ

ಅಂದ್ಕಾರಾ ವೆಳಾ

ಉಜ್ವಾಡ್ ಪಾಂಕೊಂಕ್

ಸೊದ್ತೊಲೊಯ್ ತುಂ ಮ್ಹಾಕಾ...

ಮ್ಹಜ್ಯಾ ನಿಸ್ವಾರ್ಥ್ವಣಾನ್

ಶಿಕ್ಲೆಲ್ಲೊ ತುಂ ಆಜ್

ವಡ್ಲ್ಯಾ ಪದ್ವೆರ್ ಬಸೊನ್

ಜಾತ್-ಕಾತ್ ಮ್ಹಣೊನ್

ನೆಗಾರ್ತಾಯ್ ತುಂ ಮ್ಹಾಕಾ

ತುಜ್ಯಾ ಸ್ವಾರ್ಥಾಖಾತಿರ್

ಜಿವಿತ್ ಮ್ಹಜೆಂ ವಿಬಾಡುನ್

ತುಜ್ಯಾ ಖಾತಿರ್ ಕರ್ಗಾಲ್ಯಾಕ್

ದಿಲಿನೆ ತುವೆಂ ಭರ್ಪುರ್

ನಾಲಿಸಾಯ್ ಮ್ಹಾಕಾ

ಮ್ಹಜೆಂ ಜೀವನ್ ಜಾವ್ನಸಾ

ಸರ್ವಾಂಕ್ ಉಜ್ವಾಡ್ ದಿಂವ್ಚೆ

ಆಪ್ಣಾಕಚ್ ಜಳೊವ್ನ್

ದುಸ್ರಾಂಕ್ ಉಪ್ಕಾರಾಂವ್ಚೆ....

ತರ್ ಮ್ಹನ್ಶಾ...

ಮ್ಹಾಕಾ ಜಳಯ್ ಮ್ಹಣ್ತಾನಾ

ಜಾತಿಕ್ ಕಿತ್ಯಾಕ್ ಮದೆಂ ಹಾಡ್ತಾಯ್

ಹಾಂವೆ ಕೆದ್ನಾಂ ಪುಣಿ ಸಾಂಗ್ಲೆಗಿ ತುಕಾ

ಮ್ಹಣೊನ್ ಹಾಂವ್ ಫಾಲಾಣ್ಯಾಂ ಜಾತಿಚಿಂ...

ವ್ಹಯ್, ಕೊಣಿ ಜಲ್ಮೊ, ಕೊಣಿ ಮರುಂ

ತಾಂಚ್ಯಾ ಘರಾನಿಂ ದಿತಾತ್ ಮ್ಹಾಕಾ ಪಯ್ಲೊ ಮಾನ್

ಕಿತೆಂಯ್ ವಾಯ್ಟ್ ಜಾಂವ್ ಯಾ ಬರೆಂ ಜಾಂವ್

ಸರ್ವಾಂಚ್ಯಾ ಹಾತಿಂತ್ ಆಸ್ತಾಂ ಹಾಂವ್...

ಮ್ಹನ್ಶ್ಯಾ, ಕೆದಿಂಚ್ ಮ್ಹಾಕಾ ದುರ್ಸಾನಾಕಾ

ಮ್ಹಜ್ಯಾ ವಿಶೆಂತ್ ವಾಯ್ಟ್ ಉಲಯ್ನಾಕಾ

ಫಾಲ್ಯಾಂಚ್ಯಾ ದಿಸಾ ಕರೆಂಟ್ ಗೆಲೆಂ ತರ್

ಫರತ್ ತುಂ ಯೆತೊಲೊಯ್ ಸೊದೊನ್ ಮ್ಹಾಕಾ

ತೆದ್ನಾಂ ಹಾಂವ್ ಕೆದಿಂಚ್ ಸಾಂಗ್ಚಿನಾ ತುಕಾ

ತುಂ ಮ್ಹಜ್ಯಾ ಜಾತಿಚೊ ನಯ್.............

ಬಗರ್ ಹಾಂವ್ ಜಳ್ತೆಲಿಂ ನಿಸ್ವಾರ್ಥ್ವಣಾನ್

ಜಾತ್ ಕಾತ್ ಮ್ಹಳ್ಯಾ ಭುತಾಕ್ ಲಾತ್ ಮಾರೊನ್

:- ಸುರೇಶ್ ಸಲ್ದಾನ್, ಸಕಲೇಶ್ಪುರ್