ಸಾಂಗ್ ಬಾಯೆ ಸಾಂಗ್ ಕೆದ್ನಾಂ ತುಂ ಯೆತಾಯ್ .....????

ಸಾಂಗ್ ಬಾಯೆ ಸಾಂಗ್ ಕೆದ್ನಾಂ ತುಂ ಯೆತಾಯ್ .....????

ಫಾಂತ್ಯಾಫರಾರ್ ಸ್ವಪ್ಣಾಂತ್ ಯೇವ್ನ್ 

ನಿದೆಂತ್ಲೆಂ ಜಾಗಯ್ತಾಯ್ 

ಕಾಳ್ಜಾದಾರಾರ್ ಮ್ಹಜ್ಯಾ  ಬಸೊನ್ 

ನಜ್ರ್ಯಾನಿ ಚಿಡಾಯ್ತಾಯ್

ಚಿಂತ್ಣಾನಿ ತುಜ್ಯಾಚ್ ಬುಡೊವ್ನ್ 

ಉಶ್ಯಾಕ್ ವೆಂಗೆಯ್ತಾಯ್ 

ಸೊಬಿತ್ ತುಜ್ಯಾ ರುಪ್ಣ್ಯಾನ್

ಮ್ಹಾಕಾ ಸುಡ್ಸುಡಿತ್  ಕರ್ತಾಯ್ 

ಸದಾಂ ಸಕಾಳಿಂ ಬಸ್ಸಾರ್ ತುಂ  ಮೆಳ್ತಾಯ್ 

ಉಸ್ಕ್ಯಾರ್ ಮ್ಹಜ್ಯಾ  ಪೊತೆಂ ತುಜೆಂ  ದವರ್ತಾಯ್  

ತುಜ್ಯಾ ಸೊಬಿತ್ ಹಾಸ್ಯಾರ್ ಕಾಳಿಜ್ ಸೊರ್ತಾಯ್  

ತುಜ್ಯಾ ಪೊಕ್ರಿ ನಜ್ರ್ಯಾರ್ ಮ್ಹಾಕಾ  ಚೊಯ್ತಾಯ್  

ಲಾಗಿಂಚ್ ಮ್ಹಜ್ಯಾ ರಾವ್ತಾಯ್, 

ತರೀ ಉಲೊಂವ್ಕ್ ಖಾವ್ಜೆತಾಯ್ 

ಸಾಂಗಾತ್ ಮ್ಹಜೊ ಆಶೆತಾಯ್, 

ತರೀ ಸಾಂಗೊಂಕ್ ಲಜೆತಾಯ್

ಮೊಗಾಕ್ ಮ್ಹಜ್ಯಾ ಲಾಲೆತಾಯ್ 

ತರೀ ಕರೊಂಕ್ ಭಿಯೆತಾಯ್

ವೆಂಗೊಂಕ್ ಮ್ಹಾಕಾ ಚಿಂತಾಯ್

ತರೀ ನಕ್ರ್ಯಾನಿ ಸತೆಯ್ತಾಯ್...

ಸಾಂಗ್ ಬಾಯೆ ಸಾಂಗ್ ತುಂ 

ಕೆದ್ನಾಂ ತುಜೆಂ ವೊಂಟ್ ಉಗಡ್ತಾಯ್..????

ತುಜ್ಯಾ ತ್ಯಾ ಮೊವಾಳ್ ತಾಳ್ಯಾನ್

ಕೆದ್ನಾಂ ಮ್ಹಾಕಾ ನಾಂವಾನ್ ಅಪಯ್ತಾಯ್...

ಸದಾಂಯ್ ಚಿಂತಾ ತುಜೆಕಡೆ ಉಲೊಂವ್ಚ್ಯಾಕ್

ನಜ್ರ್ಯಾಂಕ್ ತುಜ್ಯಾ ನಜ್ರೆ ಮೆಳೊಂವ್ಚ್ಯಾಕ್ ...

ಧ್ಯೆರ್ ಪಾವಾನಾ ತುಂ ಬಸ್ಸಾರ್ ಯೆತಾಚ್

ಹಾತ್ ಪಾಯ್ ಕಾಂಪ್ತಾತ್ ತುಕಾ ದೆಕ್ತಾಚ್

ತರೀ ಸಂತೊಸ್ ಭಗ್ತಾ ಸದಾಂದಿಸ್

ತುಜೆ ಸಂಗೀ ಅಪಾ-ಲಿಪಾ ಖೆಳ್ ಖೆಳ್ಚ್ಯಾಕ್ 

ಲಿಪೊನ್ ಲಿಪೊನ್ ತುಜಿ ಸೊಭಾಯ್  ಚಾಕ್ಚ್ಯಾಕ್ ....

ಜಾಣಾಂ ಹಾಂವ್ ತುಂ ಮ್ಹಾಕಾಚ್  ಆಶೆತಾಯ್ 

ಕಾಳ್ಜಾಚೊ ತುಜೊ ರಾಯ್ ಕರೊಂಕ್ ಚಿಂತೊನ್ ಅಸಾಯ್ 

ಬಸ್ಸಾರ್ ಜಾಗೊ ಅಸ್ಲ್ಯಾರಿ ಮ್ಹಜ್ಯಾ ಕುಶಿನ್ಂಚ್  ರಾವ್ತಾಯ್ 

ಸಾಂಗ್ ಬಾಯೆ ಸಾಂಗ್ ಕೆದ್ನಾಂ ತುಂ ಮ್ಹಜೆಂಚ್  ಜಾತಾಯ್ ..‌‌‌????

ಶಿಕಾಪ್ ಜಾಲ್ಲೆಂಚ್ ಯೆತೊಲೊಂ ಹಾಂವ್  ತುಂಮ್ಗೆರ್ 

ರಸ್ಮಾ ಸಾಡಿಯೆರ್ ಘೆವ್ನ್ ಯೆತೊಲೊಂ ತುಕಾ  ಆಂಮ್ಗೆರ್

ವೆಂಗೊನ್ ಬೊಂವ್ಯಾಮಿ ಸಗ್ಳೊ ಸಂಸಾರ್ ಬರ್ 

ಮಾಯಾಮೊಗಾನ್  ರಾಂವ್ಯಾಮಿ  ಆಮ್ಚೆಂ ಜಿವಿತ್ ಬರ್ ..‌

✍    ಸುರೇಶ್ ಸಲ್ಡಾನ್ಹಾ, ಸಕಲೇಶ್ಪುರ್