ತೀತಿನ್ ಬಾಯ್ಲ್ಯೊ.....

ತೀತಿನ್ ಬಾಯ್ಲ್ಯೊ.....

ಕಸಲಿ‌ ಗಜಾಲ್ 

ಕೊಣ್ ತೊ‌ ನೆಣಾ

ಗಲ್ಪಾಗಾರಾಕ್ 

ಆಸಾತ್ ಖ್ಯೆಂ

ತೀತಿನ್ ಬಾಯ್ಲ್ಯೊ.....

ಕೆದ್ನಾಂ ಕೊಣಾ

ಸಂಗಿ ಆಸುಂ

ಕೆದ್ನಾಂ ಕೊಣಾ

ಸಂಗಿ ರಾವುಂ

ಚಿಂತೊನ್ ಚಿಂತೊನ್ 

ಬಾವ್ದೊ ತೊ 

ಗೆಲಾ ಬಾವೊನ್.....

ಪಯ್ಲಿ ಬಾಯ್ಲ್ ....

ಸಾಕ್ರಾಮೆಂತಾ ಪುಡೆಂ

ಸಾಸೆರ್ದೊತ್ ಸಮೊರ್

ಹಾತಾಕ್ ಹಾತ್ ದರೊನ್

ಮೊಗಾಚಿ ಬಾಸ್ ದಿವೊನ್

ಜಿವಿತ್ ಬರ್‌ ಸಾಂಗಾತಾ 

ದಿತಾಂ ಮ್ಹಳ್ಳೆಂ.......

ಆಜ್ ಘರ್ ದಾರ್ ಪಳೆವ್ನ್

ಬುರ್ಗ್ಯಾಂಚಿ ಜತನ್ ಘೆವ್ನ್

ಎಕ್ಸುರಿ ರಾಕೊನ್ ಆಸಾ

ಪತಿಕ್ ತಿಚ್ಯಾ....

ಕೆದ್ನಾಂ ತೊ 

ಗಾವಾಕ್ ಯೆತ್

ಕೆದ್ನಾಂ ಮಾಕಾ

ಗೊಪಾಂತ್ ಗೆತ್

ಕೆದ್ನಾಂ ಮ್ಹಜ್ಯಾ

ಸಂಗಿ ಜಿವಿತ್ ಸರಾತ್.....

ದುಸ್ರೆಂ ಬಾಯ್ಲ್......

ಸದಾಂಚ್ ತಾಚ್ಯಾ

ಸಾಂಗಾತಾ ಅಸ್ತಾ 

ಥೊಡೆ ಪಾವ್ಟಿಂ

ಖೊಮಿಸಾಂತ್...

ಥೊಡೆ ಪಾವ್ಟಿಂ

ಕಾಲ್ಸಾಂವಾಂತ್

ವೆಂಗೊನ್ ಆಸ್ತಾ...

ಖ್ಯೆಂ ವೆತಾನಾಯ್

ಸಂಗಿ ಗೆವೊನ್ ವೆತಾ

ಸೊಡ್ನ್ ತಾಕಾ 

ರಾವೊಂಕ್ ಜಾಯ್ನಾ

ತಾಚ್ಯಾ ಶಿವಾಯ್ 

ವ್ಹೆಳ್ ಪಾಶಾರ್ ಜಾಯ್ನಾ

ಜಿವಿತಾಂತ್ ತೆಂಚ್ ಸರ್ವಸ್ವ್

ತಾಚ್ಯಾ ಶಿವಾಯ್ 

ರಾವ್ಲಾರ್ ಗಳ್ಯಾಕ್ 

ಬಾಂದಿತ್ ತೊ ಗಳ್ಪಾಸ್..

ತೆಂಚ್ ತಾಚೆ

ಮೊಗಾಚೆಂ ದುಸ್ರೆಂ ಬಾಯ್ಲ್

ನವ್ಯಾಚ್ ಮೊಡಾಲಾಚೆಂ 

ಮೊಲಾದಿಕ್ ಮೊಬಾಯ್ಲ್....

ತಿಸ್ರೆಂ ಬಾಯ್ಲ್

ರಾತಿಕ್ ಮಾತ್ರ್ 

ತಾಕಾ ಸಾಂಗಾತ್ ದಿತಾ 

ಥೊಡೆ ಪಾಂವ್ಟಿ‌ 

ತೊ ತಾಚೆರ್ ..

ತೆಂ ಹಾಚೆರ್ ....

ಪೊಟ್ಲೊನ್ ತಾಕಾ ದರ್ತಾಂ 

ವೆಂಗೊನ್ ತಾಕಾ ಅಸ್ತಾಂ 

ಎಕ್ಸುರಾಯೆಕ್‌ ಸಾಂಗಾತ್ 

ದಿಲ್ಯಾ ತಾಚ್ಯಾ 

ಉಸ್ಕ್ಯಾರ್ ತಕ್ಲಿ ದವರ್ನ್ 

ತೊ ಸುಶೆಗ್ ಗೆತಾಂ

ತೆಂಚ್ ತೆಂ‌ ..

ತಾಚೆ ಸಂಗಿ ಸುಖ್-ದು:ಖ್

ವಾಂಟೊನ್ ಗೆಂವ್ಚೆಂ

ತೆಂಚ್ ತೆಂ 

ತಾಚೆ ಮೊಗಾಚೆಂ

ತಿಸ್ರೆಂ ಬಾಯ್ಲ್...

ಉಶೆಂ ತೆಂ

ತಾಣೆ ವಾಪಾರ್ಚೆಂ

ಕಸಲಿ‌ ಗಜಾಲ್ 

ಕೊಣ್ ತೊ‌ ನೆಣಾ

ಗಲ್ಪಾಗಾರಾಕ್ 

ಆಸೊನಿ 

ತೀತಿನ್ ಬಾಯ್ಲ್ಯೊ 

ಜಾಲಾ ತೊ ಎಕ್ಸುರೊ......

ಗೆವುನ್ ಮಾತ್ಯಾರ್ 

ಕುಟ್ಮಾಚೊ ಬೊರೊ

ಪ್ರಾಯೆಂತ್ ತರ್ನಾಟೊ

ತರಿ ದಿಸೊಂಕ್ 

ಲಾಗ್ಲಾ ಮಾತಾರೊ....

:- ಸುರೇಶ್ ಸಲ್ಡಾನ್ಹಾ, ಸಕಲೇಶ್ಪುರ್ 

( ಹೆಂ ಮ್ಹಜೆಂ ಕವನ್ ಗಲ್ಪಾಂತ್ ಕುಟ್ಮಾಕ್ ಗಾಂವಾಂತ್ ಸಾಂಡೊನ್ ಆಸ್ಲೆಲ್ಯಾ ಸರ್ವ್ ಏಕ್ಸುರ್ಯ್ಯಾ ದಾದ್ಲ್ಯಾಂಕ್, ತರ್ನಾಟ್ಯಾಂಕ್ ಅರ್ಪಣ್ ಕರ್ತಾಂ. )