ಮಾಡ್ತಿರ್ ಸೊಜೆರಾಂಕ್ ಮೊಗಾಚಿ ಶ್ರದ್ದಾಂಜಲಿ...

ವರ್ಸಾಚೆ ಬಾರಾಯ್ ಮ್ಹಹಿನೆ
ಹಿಂವ್ ಯಾ ಪಾವ್ಶ್ ..
ವೊತ್ ಯಾ ರಾತ್ ಲೆಕಿನಾಸ್ತಾನಾ
ವಾವುರ್ಲೆ ತೆ ದೇಶಾಚ್ಯಾ ಭದ್ರತೆಖಾತಿರ್...

ದೇಶಾಖಾತಿರ್ ತೆ ಝುಜೊಂಕ್ ಗೆಲ್ಲೆ
ಜಾತ್-ಕಾತ್ ತೆ ಕಿತೆಂಚ್ ನ್ಹೆಣಾಸ್ಲೆ
ತಾಂಚೆ ಜಿವಿತ್ ದೇಶಾಕ್ ಸಮರ್ಪಿಲ್ಲೆ
ರಗ್ತಾಂತ್ ತಾಂಚ್ಯಾ ದೇಶಾಚೆ ನಾಂವ್ ಲಿಖ್ಲೆಲ್ಲೆಂ

ಬಾವೆಚಾಳಿಸ್ ಸೊಜೆರ್ ಮಾಡ್ತಿರ್ ಮೆಲೆ
ಉಜ್ವಾಡ್ಚ್ಯಾ ಪಯ್ಲೆಂಚ್ ದಿವೆ ಪಾಲ್ವಾಲೆ
ದೊಳೆ ದಾಂಪೊನ್ ಉಗಡ್ಚ್ಯಾ ಪಯ್ಲೆಂ
ಕುಡಿಥಾವ್ನ್ ಆತ್ಮೆ ತಾಂಚೆ ಮೆಕ್ಳೆ ಜಾಲ್ಲೆ

ಕೊಣ್ ತೊ ಜಾಲ್ಲೊ ನವೊಚ್ ಕಾಜಾರಿ
ಗೆಲ್ಲೊ ತೊ ಗಡಿಯೆರ್ ಜಾವ್ನ್ ಝುಜಾರಿ
ಕೊಣಾಚೆ ಬಾಯ್ಲ್ ಅಸ್ಲೆಲೆಂ ಗುರ್ವಾರ್
ಬಾಳಾಕ್ ದೆಕ್ಚ್ಯಾ ಪುಡೆಂಚ್ ಸಾಂಡ್ಲೊ ಘರ್ಕಾರ್

ಕಾಳಿಜ್ ಕಡ್ತಾ ಘಡಿತ್ ಹೆಂ ಚಿಂತಾನಾ
ದೊಳೆ ಭರ್ತಾತ್ ಘರ್ಚ್ಯಾಂಚೆ ರುದಾನ್ ಆಯ್ಕಾತಾನಾ
ಕೊಣೆಂಚ್ ಜಾತ್-ಕಾತ್ ಪಳೆಯ್ಲಿನಾ...
ರಗಾತ್ ತಾಂಚೆ ತೆಂ ಮಾರ್ಗಾರ್ ಶಿಪ್ಡಾತಾನಾ...

ಕಂಚ್ಯಾ ಪಾಡ್ತಿಚೊ ಪುಡಾರಿ ಜಾಂವ್
ಉಂಚಾಯೆರ್ ವರೊಂಕ್ ತಾಚೆ ನಾಂವ್
ಸಿಸ್ರಿಚಿ ಚಾರ್ ದು:ಖಾಂ ಗಳೊವ್ನ್
ಅಸಾ ತೊ ಅಪ್ಲೊ ಬಡಾಯ್ ಉಲೊವ್ನ್

ಮೆಲ್ಲೊ ಮ್ಹನಿಸ್ ತೊ ಪರತ್ ಉಟ್ಚೊನಾ
ಕೊಣಾಥಾವ್ನಿ ತಾಕಾ ಜಿವಂತ್ ಕರೊಂಕ್ ಜಾಂವ್ಚೆನಾ
ಮೊರ್ಣಾ ಮುಖಾರ್ ರಾಜ್ ನೀತ್ ಖೆಳೊನ್
ಸೊಜೆರಾಂಚ್ಯಾ ಆತ್ಮ್ಯಾಂಕ್ ಕರಿನಾಕತ್ ಆಕ್ಮಾನ್..

ಪೇಸ್ ಭುಕಾರ್, ವಾಟ್ಸಾಪಾರ್ , ಟ್ವಿಟಾರಾರ್
ಸಗ್ಳಾನಿ ವಾಳೊನ್ ಆಸಾ ಹಿಚ್ ಖಬಾರ್
ಮಾಗ್ಯಾಂ ದೆವಾಕಡೆ ಸರ್ಪೊಡೊನ್ ದಿಂಬಿಯೆರ್
ಲಾಬೊಂಕ್ ಜಾಗೊ ತಾಂಕಾ ಸರ್ಗಾರ್

:- ಸುರೇಶ್ ಸಲ್ದಾನ್ಹಾ, ಪನ್ವೆಲ್ (ಸಕಲೇಶ್ಪುರ)