ಆದ್ಲೆ ತೆ ದೀಸ್ ಆಮ್ಚೆಂ ..

ಆದ್ಲೆ ತೆ ದೀಸ್ ಆಮ್ಚೆಂ ..

ವಾಡ್ಯಾಂತ್ ಏಕ್ಲ್ಯಾ ಕರ್ 
ಟಿವಿ ಹಾಡ್ಲಿ ತರ್
ಸರ್ವಾನಿಂ ತಾಂಗೆರ್ 
ಟಿವಿ ಪಳೆಂವ್ಕ್ ವೆಚೆಂ

ಪಿಲಿಪ್ಸಾಚೊ ರೆಡಿಯೊ 
ಘೆವ್ನ್ ಖಾಂದ್ಯಾರ್ 
ಜೋರಾನ್ ಪದ್ ಗಾಲೊನ್
ಮಾರ್ಗರ್ ಬಂವ್ಚೆ

ತಾಂಬ್ಸ್ಯಾ ಬಸ್ಸಾನಿಂ 
ಬಸ್ಚ್ಯಾ ಸಿಟಿಕಾತಿರ್
ತುವಾಳೊ ಘಾಲೊಂಕ್ 
ಉಡ್ಡಾದುಡ್ಡಿ ಕರ್ಚೆಂ

ತೊವ್ಸೆಂ ಯ್ಯಾ ಆಂಬೊ 
ಖಾಂವ್ಚ್ಯಾ ಕಾತಿರ್
ಮಾಂಯ್ ಕಡೆ ಪಯ್ಸಾಂಕ್ 
ಜಗ್ಡೊವ್ನ್ ಆಸ್ಚೆಂ

ವಾಡ್ಯಾಂತ್ ಕಾಜಾರ್ ಆಸ್ಲಾರ್ 
ಮಾಟೊವ್ ಗಾಲೊಂಕ್ ವೆಚೆಂ
ಘರಾಚ್ ದುಕೊರ್ ಮಾರ್ನ್ 
ಬೊಟಿ ಖಾಂವ್ಕ್ ರಾಕೊನ್ ರಾಂವ್ಚೆ

ಮಾಟ್ವಾಂತ್ ದರ್ನಿರ್ ಬಸೊನ್
ಸಿರೊತ್ಯಾನಿ ಜೆಂವ್ಚೆ.
ವರ್ನ್ ಬಾಯ್ರ್ ವೆತಾ ಮುಣ್ 
ದರ್ವೊಡೊನ್ ಖಾಂವ್ಚೆ

ದಾ ಭಾರಾ ಮ್ಯೆಲಾಂ ಚಲೊನ್
ಇಸ್ಕಾಲಾಕ್ ವೆಚೆಂ
ಬ್ಯಾಗಾಂತ್ ಬಿಂಡಾ, ಅಂಬೆ, 
ಚಿತುರ್ಲ್ಯೊ ಸೊರ್ನ್ ಹಾಡ್ಚೆ

ಪಾಯಾಂಕ್ ಮೊಚೆ ನಾಸ್ತಾನಾ 
ಕಾಂಟ್ಯಾ ಬೊಲ್ಯಾನಿ ರಿಗ್ಚೆ
ಕಾಂಟ್ ಬರ್ ವಸ್ತುರ್ ಘೆವ್ನ್ 
ತಳ್ಯಾಕ್ ಉಂಬ್ಳೊಂಕ್ ವೆಚೆಂ

ಮಾರ್ಗಾರ್ ಕಾರಾಕ್ ದೆಖ್ತಾಚ್ 
ತಾಚ್ಯಾ ಪಾಟ್ಲಾನ್ ವೆಚೆಂ
ಐಸ್ ಕ್ಯಾಂಡಿ ಯೆತಾನಾ 
ಕ್ವಾಟರ್ ಬಾಟಲ್ ಘೆವ್ನ್ ದಾಂವ್ಚೆ

ದೊನ್ ರುಪಾಯ್ ಹಾತಾಂತ್ 
ಘೆವ್ನ್ ಸಕ್ಕಡಾಂಕಿ ದಾಕೊಂವ್ಚೆ
ಮಾಂಯ್ ಸಂಗಿ ಮಾರ್ಕೆಟೆಂತ್ 
ವಡಾ ಖಾಂವ್ಕ್ ಜಗ್ಡೊಂವ್ಚೆ

ಮೊರಾಚೆಂ ಪಾಕ್ ಭುಕಾಬಿತರ್
ದವರ್ನ್ ಪಿಲಾಂಕ್ ರಾಕ್ಚೆ
ದಾವಿ ಕ್ಲಾಸ್ ಮುಸೊರ್ ದೊಂಪ್ರಾ 
ವಯ್ರ್ ಚಡ್ಡಿಗಾಲ್ನ್ ಆಸ್ಚೆಂ

ಚೆಡ್ವಾಂಕ್ ಪಳೆತಾನಾ ಮಯ್ಲಾ 
ಪಯ್ಸ್ ಲಜೆನ್ ದಾಂವ್ಚೆ
ಕಾಣ್ಯೆ ಭುಕ್, ಭುಕಾಬಿತರ್ 
ದವರ್ನ್ ಲಿಪೊನ್ ವಾಸ್ಚೆಂ

ಫೆಸ್ತಾ ಪರ್ಭೆಕ್ ನೊವೆಂ 
ವಸ್ತುರ್ ಘಾಲ್ನ್ ಮಿಸಾಕ್ ವೆಚೆಂ
ಲಗ್ನಾಚಿ ಪ್ರಾಯ್ ಜಾಲ್ಯಾರಿ 
ಗಾಗ್ರು ಬಾಜು ಘಾಲ್ನ್ ಖೆಳ್ಚೆಂ

ದೊಳ್ಯಾನಿಂ ಉದೆತಾತ್ ದು:ಖಾ 
ಪಯ್ಲೆಂಚೆ ದೀಸ್ ತೆಂ ಚಿಂತಾನಾ
ಆದ್ಲೊ ತೊ ಸಂತೋಶ್ ಉಲ್ಲಾಸ್ 
ಪರತ್ ಆಂಮ್ಕಾ ಮೆಳ್ಚೊನಾ..

ಆತಾಂಚ್ಯಾ ಬುರ್ಗ್ಯಾಂಕ್ 
ಸಭಾರ್ ಸೌಲೆತ್ಯೊ ಆಸ್ಲಾರಿ
ಪಯ್ಲೆಂಚೊ ತೊ ಆನಂದ್ 
ತಾಂಕಾ ಮೆಳ್ಚೊನಾ.

ಟಿ,ವಿ, ಸಿನೆಮಾ , ಪ್ಯಾಶನಾಂ 
ಪಳೆವ್ನ್ ಬದ್ಲ್ಯಾಲ್ಯಾರಿ
ಪಯ್ಲೆಂಚ್ಯಾ ಗಾಗ್ರ್ಯಾ ಬಾಜ್ವೆಚಿ 
ತಿ ಸೊಭಾಯ್ ಪರತ್ ಮೆಳ್ಚಿನಾ

ಸುರೇಶ್ ಸಲ್ಡಾನ್ಹಾ,