ಸುಕ್ಣ್ಯಾಚ್ಯಾ ಪಿಲಾಚೆ ರುದಾನ್

ಸುಕ್ಣ್ಯಾಚ್ಯಾ ಪಿಲಾಚೆ ರುದಾನ್

ಮಾಂಯ್ ತುಂ ಪಾಟಿಂ ಯೆ ಮಾಂಯ್

ಎಕ್ಸುರ್ಯಾಕ್ ಮಾಕ ಹಾಂಗ ಭ್ಯೆಂ ದಿಸ್ತಾ

ಮಾಂಯ್ ತುಂ ಪಾಟಿಂ ಯೆ ಮಾಂಯ್

ಘೊಂಟೆರಾಂತ್ ಭಾಳ್ ತುಜಿ ವಾಟ್ ರಾಕ್ತಾ....

ಉಜ್ವಾಡ್ಚ್ಯಾ ಪಯ್ಲೆಂ ತುಂ ಗೆಲ್ಲಿಯ್

ಜೆವಾಣ್ ಘೆವ್ನ್ ಯೆತಾ ಮ್ಹಣ್ತಾಲಿಯ್

ಸಾಂಜೆಚೊ ಸುರ್ಯೊ ತೊ ಬುಡ್ಲ್ಯಾರಿ

ಅಜುನಿ ತುಂ ದಿಸೊನ್ ಯೆನಾಯ್...

ಗುಡ್ಯಾ -  ದೊಂಗೊರಾ ಮ್ಹದೆಂ ಪುಣಿ ಗೆಲ್ಯಾಯ್ಗಿ ??

ಕಾಂಟ್ಯಾ -ಕುಂಟ್ಯಾ ಮದೆಂ ಪುಣಿ ಶಿರ್ಕಾಯ್ಲ್ಯಾಗಿ ??

ಭುಕೆನ್ ಮಾಕಾ ಹಾಂಗಾ ಕಿತೆಂಚ್ ದಿಸಾನಾ

ವೆಗ್ಗಿಂ ವೆಗ್ಗಿಂ ತುಂ ಪಾಟಿಂ ಯೆ ಮಾಂಯ್...

ಮೊಳ್ಬಾರ್ ಕಾಳ್ಬಾಣ್ ದಿಸೊನ್ ಯೆತಾ

ಬಿರಾಂಕುಳ್ ವಾರ್ಯಾನ್ ಬಿಡಾರ್ ಹೆಂ ಹಾಲ್ತಾ...

ಘಡ್ಗಡ್ಯಾ - ಜಗ್ಲಾಣ್ಯಾನಿ ಕುಡ್ ಮ್ಹಜಿ ಕಾಂಪ್ತಾ

ಶಿರಾಂದಾರಿಚೊ ತೊ ಪಾವ್ಶ್ ತೊ ವೊತ್ತಾ....

ಮಾಂಯ್ ತುಂ ಪಾಟಿಂ ಯೆ ಮಾಂಯ್

ತುಜ್ಯಾ ಪಾಕಾಟ್ಯಾ ಪಂದಾ ಮಾಕ ಲಿಪಾಯ್

ಯೇವ್ನ್ ತುಜ್ಯಾ ಗೊಪಾಂತ್ ಮಾಕಾ ಆರಯ್

ತುಜ್ಯಾ ಮೊಗಾಚ್ಯಾ ವೇಂಗೆಂತ್ ಮಾಕ ಬುಡಯ್

ಕಾವ್ಳೊ ಯೇವ್ನ್ ಖಾಯ್ತ್ ಮಾಕಾ

ತುಜ್ಯಾವಿಣೆ ಕೊಣಿನಾಕಾ ಮಾಕಾ

ಯ್ಯಾ ಕಾಳೊಕಾಚ್ಯಾ ಭುಂಯಾರಾಂತ್

ಉಜ್ವಾಡಾಚಿ ದಿವ್ಟಿ ಜಾವ್ನ್ ತುಂ ಯೆ ಮಾಂಯ್

ಮಾಗೊನ್ ಆಸಾಂ ತ್ಯಾ ದೆವಾಕಡೆ

ತುಕಾ ರಾಕ್ಚ್ಯಾಕ್ ತ್ಯಾ ಶಿಕಾರ್ಯಾಥಾವ್ನ್

ವೆಗ್ಗಿ ದಾಂವೊನ್ ದಾಂವೊನ್ ಯೆ ಘೊಂಟೆರಾಕಡೆ

ಭಾಳಾಕ್ ತುಜ್ಯಾ ದಿಂವ್ಕ್ ಮೊಗಾಚೆ ಪೆಡೆ...

ದೆವಾಕ್ ಹಾಂವೆ ಅಜುನಿ ಪಳೆಂವ್ಕ್ ನಾ ಮಾಂಯ್

ತುಂಚ್ ಮ್ಹಜಿ ಸಂಸಾರಾತ್ಲಿ ದೇವ್ ಮಾಂಯ್

ಜೆವಣ್ ನಾ ತರಿ ವ್ಹಡ್ ನಾ ಮಾಕಾ ಮಾಂಯ್

ಯೇವ್ನ್ ಮಾಕಾ ತುಜ್ಯಾ ಉಬೆಂತ್ ಘೆ ಮಾಂಯ್

:- ಸುರೇಶ್ ಸಲ್ಡಾನ್, ಪನ್ವೆಲ್ - ಅಬುಧಾಬಿ

(  ಸಕಾಳಿಂ ಪುಡೆ ಆಪ್ಲ್ಯಾ ಬಾಳಾಕ್ ಘೊಂಟೆರಾಂತ್ ಸೊಡ್ನ್ ಜೆವಣ್ ಹಾಡೊಂಕ್ ಮ್ಹಣ್ ಗೆಲ್ಲೆಂ ಆವಯ್ ಸುಕ್ಣೆ  ಸಾಂಜ್ ಜಾಲ್ಯಾರಿ ಪರತ್  ಪಾಟಿಂ ಯೇವ್ನಾತುಲ್ಲೆಂ ಪಳೆವ್ನ್ , ಸುಕ್ಣ್ಯಾಚ್ಯಾ ಪಿಲಾಚೆ ರುದಾನ್)