ಆದ್ಲೊ ಆನಿ ಆತಾಂಚೊ ಕಾಳ್

ಆದ್ಲ್ಯಾ ಕಾಳಾರ್

ನಳ್ಯಾಂಚ್ಯಾ ಘರಾಂನಿ

ಖತ್ಕತ್ಚ್ಯಾ ಉದ್ಕಾಬರಿ

ಉಮೊಳೊನ್ ಧುರಾಬರಿ

ಭಾಯ್ರ್ ವೆಚಿಂ ದುಃಖಾಂ...

ಆತಾಂಚ್ಯಾ ಕಾಳಾರ್

ಟೆರೆಸಾಚ್ಯಾ ಘರಾಂನಿ

ಕುಕ್ಕರಾ ಭಿತರಚ್

ಭಿತರ್ಲ್ಯಾ ಭಿತರ್ ಸಿಜೊನ್

ವಿಶಿಲ್ ಮಾರಿತ್ ಆಸಾತ್...

ಆದ್ಲ್ಯಾ ಕಾಳಾರ್ 

ಭರ್'ಲ್ಲ್ಯಾ ಘರಾಂತ್ 

ಪಾಕಾಟೆ ಫುಲೊನ್ 

ಸುಕ್ಣ್ಯಾ ಬರಿಂ 

ಉಬ್ಚಿಂ ತಿಂ ಭುರ್ಗಿಂ...

ಆತಾಂಚ್ಯಾ ಕಾಳಾರ್

ಫ್ಲೇಟಾಂನಿ ಯಾ ಘರಾಂನಿ

ಗುಡಾಭಿತರ್ ಘಾಲ್ಲ್ಯಾ

ಸುಕ್ಣ್ಯಾಬರಿ 

ಎಕ್ಸುರಾಯೆಂತ್ 

ರಡೊನ್ ಆಸಾತ್ ...

ಆದ್ಲ್ಯಾ ಕಾಳಾರ್

ಹಾಸೊಂಕ್ ಯಾ ರಡೊಂಕ್

ಕೊಣಾಯ್ಚಿ ಪರ್ವಣ್ಗಿ 

ನಾಕಾ ಆಸ್‍ಲ್ಲಿ ....

ಕೊಣಾಚ್ಯಾ ಘರಾ ಜಾಂವ್

ಕಾಜಾರ್, ರೋಸ್, ವ ಮರಣ್

ಲೋಕ್ ಆಸ್ತಲೊ 

ಭರೊನ್ ಪುರಾ ಅಂಗಾಣ್... 

ಕೊಣಾಚ್ಯಾ ಖುಶೆಂತ್, ದುಃಖಾಂತ್

ಆಸ್ತೆಲೆ ದೀವ್ನ್ ಎಕಾಮೆಕಾಚೊ ಸಾಂಗಾತ್...

ಆತಾಂಚ್ಯಾ ಕಾಳಾರ್ 

ಹಾಸ್ಲಾರಿ, ರಡ್ಲಾರಿ 

ವಿಸರುಂಕ್ ಕೊಣ್ ನಾ ಸೆಜಾರಿ... 

ಜಾಂವ್ ಕಾಜಾರ್, ರೋಸ್, ವ ಮರಣ್ 

ಘರಾಥಾವ್ನ್ ಎಕ್ಲ್ಯಾ ಶಿವಾಯ್ 

ನಾ ದುಸ್ರೊ ಭಾಯ್ರ್ ಸರಿ

ಕೊಣಾಚ್ಯಾ ದುಃಖಾಂತ್ 

ಕೊಣ್ ತೊ ಸಂತೋಷ್ ಪಾವ್ತಾ

ಕೊಣಾಚ್ಯಾ ಸಂತೋಷಾಂತ್ 

ಕೊಣ್ ತೊ ದುಖ್ ಪಾವ್ತಾ... 

ಆದ್ಲ್ಯಾ ಕಾಳಾರ್ 

ಮನಾಂತ್ ದುಃಖ್ ಭೊಗ್ಲಾರ್

ಆವಯ್ಚಾ ಉಸ್ಕ್ಯಾರ್ ನಿದ್ತಾನಾ

ತಿಚೊ ತೊ ಮೊಗಾಚೊ ಹಾತ್

ಕಪಲಾರ್, ಕೆಸಾಂನಿ ಖೆಳ್ತಾನಾ

ದುಃಖ್ ತೆಂ ನಿವ್ತಾಲೆಂ 

ಮ್ಹನ್ ತೆಂ ಧಲ್ತಾಲೆಂ

ಕಾಳಿಜ್ ಉಮಾಳ್ತಾಲೆಂ...

ಆತಾಂಚ್ಯಾ ಕಾಳಾರ್ 

ಮನಾಂತ್ ಬೆಜಾರಾಯ್ 

ಜಾವ್ನ್ ಆವಯ್ಚ್ಯಾ 

ಉಸ್ಕ್ಯಾರ್ ನಿದ್ತಾನಾ ..

ಹಾತ್ ತಿಚೆ ಮೊಬಾಯ್ಲಾರ್

ಬ್ಯುಸಿ ತಿ ವಾಟ್ಸಾಪಾರ್

ನಾ ತರ್ ಫೇಸ್‍ಬುಕಾರ್ 

ದುಃಖಾಂ ಯೇವ್ನ್ ದೊಳ್ಯಾಂನಿ

ವ್ಹಾಳಾತ್ ಗೆಲ್ಯಾರಿ ಪೊಲ್ಯಾಂನಿ 

ನಾ ತಿ ಕಸ್ಲಾಚ್ ಖಬ್ರೆಂನಿ 

ಬ್ಯುಸಿ ತಿ ಸೋಶಲ್ ಸೈಟಾಂನಿ...

ಆದ್ಲ್ಯಾ ಕಾಳಾರ್

ಫೊಕಣಾಂನಿ ಭರ್ಪೂರ್ ಹಾಸೊನ್

'ಚೌಕಬಾರೆ', 'ಕಣ್ಣಮುಚ್ಚಾಲೆ',

'ಕುಟ್ಟಿದೊಣ್ಣೆ' ಖೆಳೊನ್

ಪಾಂವ್ಚೊ ತೊ ಸಂತೋಸ್...

ಆತಾಂಚ್ಯಾ ಕಾಳಾರ್ 

ಆಪ್ಲಾ ಆಪ್ಲಾ ಕಾರಾಂನಿ

ಯಾ ಇಷ್ಟಾ ಮಂತ್ರಾ ಸವೆಂ 

ಶೊಪಿಂಗ್ ಮಾಲಾಂನಿ ಭಂವೊನ್

ಸಾಂಜ್ ಜಾತಚ್ ಘರಾ ಯೇವ್ನ್

ಚಡಿತ್ ಉಲೊಣೆ ನಾಸ್ತಾಂ

ಆಪ್ಲ್ಯಾ ಕುಡಾಂನಿ ವಚೊನ್

ಮೊಬಾಯ್ಲ್ ಹಾತಾಂತ್ ಘೆವೊನ್ 

ಆಪ್ಲ್ಯಾಚ್ ಸಂಸಾರಾಂತ್ ಭಂವ್ತಾತ್....

ಆದ್ಲ್ಯಾ ಕಾಳಾರ್ 

ನೀಸ್ ಜಾಂವ್ 

ಪೇಜ್

 ಆನಿ ಚೆಟ್ಣಿ ಜಾಂವ್

ತೆಂ ಜೇವ್ನ್ ಸುಶೆಗಾತ್ ಪಡ್ಚಿ ನಿದ್ ...

ಆತಾಂಚ್ಯಾ ಕಾಳಾರ್ 

ಬ್ರೆಡ್ ಜಾಂವ್ ಬಿರಿಯಾಣಿ

ಮಾಸ್ ಜಾಂವ್ ಮಾಸ್ಳಿ

ಪೊಟ್ ಭರ್ ಖಾವ್ನ್'ಯೀ

ನಿದೆಚ್ಯಾ ಗುಳಿಯಾಂಕ್ ಆಶೆತಾಂವ್ ...

ಕಳಾನಾ ಮ್ಹಾಕಾ

ಕಾಳ್ ಬದ್ಲಾಲಾಗಿ  ಯಾ

ಆಮಿ ಬದ್ಲಾಲ್ಯಾಂವ್ ..

ತರಿ 'ಕಾಲಕ್ಕೆ ತಕ್ಕ ಕೋಲ' ಮ್ಹಣೊನ್ 

ಆಮಿ ಚಲಾಜೆ ಪಡ್ತಾ 

ನಾ ತರ್ ವೆಗಿಂಚ್ 

ಆಮ್ಚೊಚ್ ಫೊಂಡ್ ಆಮಿ

ಖೊಂಡಿಜಾಯ್ ಪಡ್ತಾ...

 :- ಸುರೇಶ್ ಸಲ್ಡಾನ್, ಪನ್ವೆಲ್ ಅಬುಧಾಬಿ

Published in : Maibhaas.com