ಮೊಗಾ ತುಂ ಖಂಯ್ಸರ್ ಆಸಾಯ್ ??!?!

 ಎಕಾ ಚಲಿಯೆನ್ ಅಪ್ಲ್ಯಾ ಜಿವಾಚ್ಯಾಕಿ ವರ್ತ್ಯಾ ಮಾಪಾನ್ ಮೋಗ್ ಕೆಲ್ಲೊ ಚಲೊ ತಿಕಾ ಸಾಂಡೊನ್ ಗೆಲ್ಲ್ಯಾ ವ್ಹೆಳಾರ್..‌.‌.‌‌

*******************************************************************

ಮೊಗಾ ತುಂ ಖಂಯ್ಸರ್ ಆಸಾಯ್ ??!?!

ಮೊಗಾರ್ ಪಡ್ಲೊಯ್

ಚಂದ್ರೆಮ್ ಉದೆತಾನಾ

ಕಾಳ್ಜಾಂತ್ ರಿಗ್ಲೊಯ್

ಶಿಮ್ಟಿ ನೆಕೆತ್ರ್ ಪಡ್ತಾನಾ

ಪ್ರಶಾಂತ್ ದರ್ಯಾಂತ್

ಶಾಂತ್ ಕಾಳ್ಜಾಂತ್

ತಾರ್ವಾಬರಿ ಆಯ್ಲೊಯ್

ಉಂಚ್ಲ್ಯಾ ಲಾರಾಂತ್

ಜಿಣ್ಯೆಚ್ಯಾ ಕಷ್ಟಾಂತ್

ಫುಡ್ ಕರಿತ್ ಗೆಲೊಯ್

ಆಸ್ತಾನಾ ಪಿಡೆಂತ್

ದೀಸ್ ರಾತ್ ಉಲೊವ್ನ್

ಜತನ್ ಮ್ಹಜಿ ಘೆವುನ್

ವಯ್ಜ್ ತುಂ ಜಾವೊನ್

ಹಾತ್ ಮ್ಹಜೊ ಥಾಂಬೊನ್

ಸಾಂಡ್ಚೊನಾ ಮ್ಹಣೊನ್

ಜಿಣ್ಯೆ ಪಾಗೊರ್ ಜಾಲ್ಲೊಯ್

ತುಜೆವಿಣ್

ಜಿಣ್ಯೆ ಸಾಗೊರಾಂತ್

ಆಯ್ಲಾಂ ತೂಫಾನ್

ಉಜ್ವಾಡ್ಚೊ ದಿವೊ ತೊ

ಗೆಲಾ ಮಾಜ್ವೊನ್.....

ಥೊಡ್ಯಾ ವರ್ಸಾಂದಿ

ಉಬ್ಜಾಲ್ಲ್ಯಾ ತುಜ್ಯಾ

ತ್ಯಾ ಮೊಗಾ ಸುನಾಮಿನ್

ಮ್ಹಜೆಂ ಸುಖ್ ಸಂತೊಸ್

ಸರ್ವ್ ವೆಲಾಂ ಪುಸೊನ್

ರಾಕಾತ್ ಆಸಾಂ.‌

ಆವ್ರಾಕ್ ವಾಳ್ತಾನಾ

ಸಾಂಪ್ಡಾಲ್ಲ್ಯಾ ವಾಲಿಬರಿ

ನಿರಾಶಿ ಜಾಲ್ಯಾ ಹ್ಯಾ

ಕಾಳ್ಜಾಚ್ಯಾ ಕೊನ್ಶ್ಯಾರಿ

ಕೀರ್ಣ್ ತೆಂ ಫಾಂಕೊನ್

ಆಜ್ ನ್ಹಯ್ ತರ್ ಫಾಲ್ಯಾಂ

ಯೆತಲೊಯ್ ಮ್ಹಣೊನ್

ಜಿಣ್ಯೆ ಪಯ್ಣಾಂತ್

ದೀಂವ್ಕ್ ಆದ್ಲೊ ಸಾಂಗಾತ್

ಘೆಂವ್ಕ್ ಮ್ಹಾಕಾ ತುಜ್ಯಾ ಗೊಪಾಂತ್ ...

:- ಸುರೇಶ್ ಸಲ್ಡಾನಾ, ಸಕಲೇಶ್ಪುರ್