ಸೈರ್ಯ್ಯಾಚೆಂ ಯೆಣೆಂ

ಸೈರ್ಯ್ಯಾಚೆಂ ಯೆಣೆಂ

ಆದಿಂ

ಘರಾಂತ್ ಆಯ್ಲೆಲಿಂ ಸೈರಿಂ

ಘರಾಬಿತರ್ ರಿಗ್ಲೆಲೆಂಚ್

ವ್ಹಡಾಂ ಕಡೆ ಬೆಸಾಂವ್ ಮಾಗೊನ್

ಸುಖ್ ದುಃಖ್ ವಾಂಟೊನ್ ಗೆತೆಲೆ

ದಾದ್ಲೆ ಹಿತ್ಲಾಂತ್ ಮುರುಲ್ಲೆಂ

ಇಲ್ಲೆಶೆಂ ಅಪುಟ್ ಹಾಡ್ನ್

ಪುಡ್ವ್ಯಾ ಬಿತರ್ ದರೊನ್

ಲಿಪೊನ್ ಲಿಪೊನ್ ಶೆಕ್ತಾಲೆ

ಭಾಯ್ಲಾಂ ಎಕಾಮೆಕಾ ಬಸೊನ್

ಖಾಸ್ಗಿ ಥೊಡೆ ಖಬ್ರೆ ಉಲೊವ್ನ್

ಕುಜ್ನಾಂತ್ ಇಲ್ಲೆಂ ಕುಮೊಕ್ ಕರೊನ್

ಘರ್ಚ್ಯಾ ಮೆಟಾರ್ ಬಸೊನ್

ಎಕಾಮೆಕಾಚೆ ಕೇಸ್ ಉಗೆಯ್ತೆಲೆ....

ಭುರ್ಗಿಂ ಕುಂಟಾಬಿಲ್ಲೆ, ಅಪಾಲಿಪಾ,

ಲಗೋರಿ, ಗಿಲ್ಲಿಡಾಂಡೊ

ಅಸಲ್ಯಾ ಸರ್ವ್ ಖೆಳಾನಿಂ

ವೇಳ್ ಪಾಶಾರುನ್ ಅಸ್ತೆಲೆ..

ಆಸ್ಲೆಲ್ಯಾಂತ್ ವಾಂಟೊನ್ ಖಾವ್ನ್

ಎಕ್ ಲಾನ್ಶಿ ನೀದ್ ಕಾಡ್ನ್

ಹಿತ್ಲಾಂತ್ ಭಂವೊನ್

ವೆತಾನಾ ಇಲ್ಲಿಶಿ ರಾಂದ್ವಾಯ್ ಘೆವೊನ್

ಎಕಾಮೆಕಾಕ್ ಆದೇವ್ಸ್ ಮಾಗ್ತಾಲೆ.

*ಆತಾಂ*

ಘರಾ ಬಿತರ್ ರಿಗ್ತಾನಾಂಚ್,

ಎಕೊಡೆ ನಜರ್ ಮಾರೊನ್

ಘರ್ಚಿ ಸೊಬಾಯ್ ವರ್ಣೊನ್

ವೈ ಪೈ ಅಸಾಗಿ ಮ್ಹಣ್ ನಕ್ಕಿ ಕರ್ತೆಲೆ

ದಾದ್ಲೆ ಉಗ್ತ್ಯಾನ್ ಬಾರ್ ಉಗಡುನ್

ಸೊರೊ‌ ಬಿಯರ್ ಶೆಕೊನ್

ಪುಡಾರ್ಯ್ಯಾಂಚೆ ಖಬ್ರೆ ಉಸ್ತೊನ್

ಅಪ್ಲ್ಯಾಚ್ ಸಂಸಾರಾಂತ್ ಅಸ್ತೆಲೆ.

ಬಾಯ್ಲಾಂ, ಅಪ್ಲಿಚ್ ವಡ್ಪೊಣ್ ಉಲೊವ್ನ್

ಸಾಡಿ, ಬಾಂಗಾರ್, ಘರ್ ದಾಕೊವ್ನ್

ಎಕಾಮೆಕಾಚೆ ಪಾಯ್ ವೊಡೊನ್

ದಾದ್ಲ್ಯಾಂಕ್ ಸಾಂಗತ್ ದಿತೆಲೆ

ಭುರ್ಗಿಂ , ಸೊಪಾರ್ ಯಾ ಕುಡಾನಿಂ

ಗೇಮ್ ಖೆಳೊನ್, ಯಾ ಸ್ಟೆಟಸ್ ಗಾಲೊನ್

ಬ್ಯುಶಿ ಅಸ್ತೆಲೆ ಅಪಾಪ್ಲ್ಯಾ ಮೊಬಾಯ್ಲ್ಯಾನಿಂ

ಬುಡೊನ್ ಅಸ್ತೆಲೆ ಸೊಶಿಯಲ್ ಮಿಡಿಯಾನಿಂ‌.

ಸೊಬಾಯ್ ವಿಬಾಡ್ಚ್ಯಾ ಬಿಯಾನ್

ಪಿಯೆವ್ನ್ ಚಲೊಂಕ್ ಜಾಯ್ನಾತ್ಲ್ಯಾನ್

ದಾಕ್ಷೆಣೆಕ್ ಇಲ್ಲೆಂ ಜೆವಾಣ್ ಕರೊನ್

ಪಾಟಿಂ ಯೆತೆಲಿಂ ತಾಂಕಾಂಯ್

ಯೆಂವ್ಚ್ಯಾ ಹಪ್ತ್ಯಾ ಆಪ್ಣಾಕರ್ ಜೆವ್ಣಾಕ್ ಅಪೊವ್ನ್

:- ಸುರೇಶ್ ಸಲ್ಡಾನ್, ಸಕಲೇಶ್ಪುರ್

( ಸೂಚನ್ :- ಹೆಂ ಕವನ್ ಸ್ವಕಲ್ಪಿತ್ ಜಾವ್ನಾಸಾ,. ಆದ್ಲಿ ಆನಿ ಅತಾಂಚಿ ಪರಿಸ್ಥಿತಿ ಪಳೆವ್ನ್ ಲಿಖ್ಲೆಲೆಂ ಜಾವ್ನಾಸಾ. ಆಮಿ‌ ಆಮ್ಚ್ಯಾ ಸೈರ್ಯ್ಯಾ

ಕರ್ , ಯಾ ಮೊಗಾಚ್ಯಾಂ ಕರ್ ವೆತಾಂವ್ ತರ್ ಆಮ್ಚ್ಯಾ ಮೊಬಾಯ್ಲಾಂಕ್ ಸುಟ್ಕಾ ದೀವ್ನ್ ಜಾತಾ ತಿತ್ಲೊ‌ ವ್ಹೇಳ್ ತಾಂಚೆಲಾಗಿಂ ಉಲೊವ್ನ್ ಖರ್ಚುಂವ್ಯಾ , ಆನಿ ಎಕಾಮೆಕಾಕ್ ಮೊಗಾನ್ ಜಿಯೆಂವ್ಯಾ. )

ದೇವ್ ಬರೆಂ ಕರುಂ .