ಯೆ ಯೆ ತುಂ ಉದ್ಕಾಝರಿ

ಯೆ ಯೆ ತುಂ ಉದ್ಕಾಝರಿ

ತಳ್ಯಾ ಸರ್ಶಿಂ ಬಸೊನ್ 

ಯೆಣ್ಯಾಕ್ ತುಜ್ಯಾ 

ಆಸಾಂ ರಾಕೊನ್ 

ಈ ಸುಕಿ ದರ್ತ್ ಬಿಜೊಂಕ್ 

ಯೆ ಯೆ ತುಂ ಯೆ ಉದ್ಕಾಝರಿ

ತುಜ್ಯಾವಿಣೆಂ ಖರೆಂ

ಸರ್ವ್ ಜಾತಲಿ ಸಾರೆಂ

ಬರೊಂಕ್ ಹೆಂ ತಳೆಂ

ಕರೊಂಕ್ ಮುಕ್ಲೆಂ ಬೆಳೆಂ

ಯೆ ಯೆ ತುಂ ಯೆ ಉದ್ಕಾಝರಿ

ತುಜ್ಯಾ ಸಂಗಿ ಕರ್ಚಿಲ್ಲಿ ತಿ ಘಡಿ

ಬಸೊನ್ ಉಗ್ಡಾಸಾಕ್ ಹಾಂವ್ ಹಾಡಿ

ಕಾಗ್ದಾಚ್ಯೊ ಕರೊನ್ ಘಡಿ

ದೊಣ್ ಸೊದ್ನ್ ಗಾಲ್ಲೆ ತೆ ಉಡಿ

ಸುಕ್ಲೆಲೆಂ ಶೆಟ್ ತೆಂ ಬಿಜೊಂಕ್ ತುಂ ಯೆ

ಕಾಳ್ಜಾಂಕ್ ಥಂಡಾಯ್ ಕರುಂಕ್ ತುಂ ಯೆ

ಚಿಕ್ಳಾಂತ್ ಬುಡ್ಲೆಲ್ಯಾಂಕ್ ನಿತಳ್ ಕರುಂಕ್ ತುಂ ಯೆ 

ಬಾಣಾ ತೆದಿಂ ಪೊಟಾಂ ಬರುಂಕ್ ತುಂ ಯೆ....

ಹಾಂವ್ ಆಪೊವ್ನ್ ಅಸಾಂ ತರಿ

ತುಂ ಕಶೆಂ ಯೆತೆಲೆಂಯ್ ......??

ತುಜ್ಯಾ ಪೊಟಾವಯ್ರ್

ಮಾತಿಯೆಚೊ ಪಾಗೊರ್ ಕರುನ್ ..

ತಾಚೆರ್ ವ್ಹಡ್ ವ್ಹಡ್

ರಾವ್ಳೆರಾಂ ಬಾಂದೊನ್...

ತುಜ್ಯಾ ತೊಂಡಾಕ್ 

ವ್ಹಡ್ ಜಾಯ್ತೆಂ ಬೀಗ್ ಗಾಲೊನ್ 

ಅಪ್ಲೆಂ ಪೊಟ್ ಬೊರೊಂವ್ಕ್ 

ಆಶೆಂವ್ಚ್ಯಾ

ಹ್ಯಾ ಮ್ಹನ್ಶಾಜಾತಿ ಮುಕಾರ್

ತುಂ ಕಶೆಂ ಯೆತೆಲೆಂಯ್ ..???

ತುಜ್ಯಾವಿಣೆಂ 

ಜೀವಿತಾಂತ್ ನಾ ಸುಖ್

ದೆಂವ್ಚೆನಾಂ ದೊಳ್ಯಾಂತ್ ದುಃಖ್ 

ತಾಂಬ್ಚಿನಾ ಮ್ಹಜಿ ತಾನ್ 

ಭಗ್ಚಿನಾ ಮ್ಹಜಿ ಭುಕ್

ಯೆ ಯೆ ತುಂ ಯೆ ಉದ್ಕಾಝರಿ...

ಯೆ ಯೆ ತುಂ ಯೆ ಉದ್ಕಾಝರಿ....

✍ ಸುರೇಶ್ ಸಲ್ಡಾನ್, ಸಕ್ಲೇಶ್ಪುರ್ ಪನ್ವೆಲ್,