ಚಾರ್ ದಿಸಾಂಚೊ ಸಂಸಾರ್

ಚಾರ್ ದಿಸಾಂಚೊ ಸಂಸಾರ್

ಸಂಸಾರಾಕ್ ಯೆತಾನಾ

ವಿಣ್ಗೆಂ ಜಾವ್ನ್

ರಡಾತ್ ಯೆತಾಂವ್

ಸಂಸಾರ್ ಸಾಂಡ್ತಾನಾ

ವಿಣ್ಗೆಂ ಜಾವ್ನ್

ಸರ್ವಾಂಕ್ ರಡೊವ್ನ್ ವೆತಾಂವ್

ಸಂಸಾರಾಂತ್ ಅಸ್ತಾನಾ

ರಾಗ್, ಮೊಸೊರ್ ಹಂಕಾರಾನ್

ಸರ್ವಾಂಕ್ ದುಃಖೆಯ್ತಾಂವ್

ಚಾರ್ ದಿಸಾಂಚ್ಯಾ

ಸಂಸಾರಿ ಪಯ್ಣಾಂತ್

ಲೌಕಿಕಾಯೆಕ್ ವೆಂಗ್ತಾಂವ್

ಅಸ್ತ್ ಬಾಂಗಾರಾಕ್ ಲಾಗೊನ್

ಆಮ್ಚ್ಯಾ ಕುಟ್ಮಾಂತ್

ದುಸ್ಮಾನ್ ಕಾಯ್ ಹಾಡ್ತಾಂವ್

ಜಾತ್ ಕಾತ್ ಮ್ಹಣೊನ್

ಎಕಾಮೆಕಾಚಿ ಮಾಸಾಂ ಖಾವ್ನ್‌

ರಗ್ತಾಕ್ ತಾನೆತಾಂವ್

ಆನಿ ಆಖೇರಿಕ್‌

ಎಕ್‌ ದೀಸ್

ಮಾತ್ಯೆಕ್ ಸಾರೆಂ‌ ಜಾತಾಂವ್ ....

ತರ್ ಇಷ್ಟಾ

ಅಪುಣ್ , ಅಪ್ಣಾಕ್ ಮ್ಹಣ್

ಪುಂಜಾಯ್ಲೆಂ ಗೆಲೆಂ‌ ಕಂಯ್ ..????

ದುಸ್ರ್ಯಾಂಕ್ ಮೊಸ್ ಕರ್ನ್‌

ಕಮೆಯ್ಲೆಂ ದವರ್ಲಾಂಯ್ ಕಂಯ್ ....????

ಹೆರಾಂಚಿ ನಿಂದಾ ಕರ್ನ್

ತಾಂಕಾ ನಿರಾಶಿ ಕರ್ನ್

ತಾಂಚ್ಯಾ ಜಿವಿತಾಂತ್

ವೀಕಾಳ್ ಸರೊಪ್ ಜಾವ್ನ್

ತುಜೆಂ‌ ವೀಕ್‌ ವೊಂಕೊವ್ನ್‌

ಕಿತೆಂ ಮ್ಹೆಳ್ಳೆಂ ತುಕಾ

ತಾಂಚೆ ಜಿವಿತ್ ವಿಬಾಡುನ್ ...

ಚಾರ್ ದಿಸಾಂಚ್ಯಾ

ಹ್ಯಾ ಸಂಸಾರಾರ್

ಬರೆಂ‌ ಕರ್ಶಿ ತರ್

ಅಮರ್‌ ಉರ್ತಾಲೊಯ್

ಸರ್ವಾಂಚ್ಯಾ ಕಾಳ್ಜಾಂತ್‌

ನಾ ತರ್ ಲಾಸ್ತೊಲೊಯ್

ಪಾತಾಳಿ ಉಜ್ಯಾಂತ್

:- ಸುರೇಶ್ ಸಲ್ಡಾನ್, ಸಕಲೇಶ್ಪುರ