ದೆವಾ ಸಮೊರ್ ಕಿತೆಂಚ್ ನಾ........

ದೆವಾ ಸಮೊರ್ ಕಿತೆಂಚ್ ನಾ........

ಕೊರೊನಾಕ್ ಚಿಂತಾನಾ ಕಾಳಿಜ್‌ ಹೆಂ ಲಾಸ್ತಾ

ತಾಂತ್ಲಿ ಮೊರ್ಣಾ ದೆಖ್ತಾನಾ ಮ್ಹನ್ ಹೆಂ ಕಡ್ತಾ

ಹಾಕಾ ಲಾಗೊನ್ ಸಗ್ಳೊ ಸಂಸಾರ್ ರಡ್ತಾ

ದೆವಾಕ್ ಆಮ್ಚೆರ್ ರಾಗ್ ಆಯ್ಲ್ಯಾಬರಿ ದಿಸ್ತಾ

ಕಿತೆಂ ಜಾಲೆಂ‌ ಕಳಾನಾ ಹ್ಯಾ ಸಂಸಾರಾಕ್

ಕೊಣೆ ಡಾಡ್ಲೆಂ‌ ‌ನ್ಹೆಣಾಂ ಹ್ಯಾ ಕೊರೊನಾಕ್

ಸಂಸಾರ್ ಸಗ್ಳೊ ಥರ್ಥರುನ್ ಗೆಲಾ ಹ್ಯಾ ಪಿಡೆಕ್

ಲೋಕ್ ಸಗ್ಳೊ ಉಚಾಂಬುಳ್ ಜಾಲಾ ಘರಾ ಬಸ್ಚ್ಯಾಕ್

ಅತಾಂ ದಿವ್ಳಾಂತ್ಲ್ಯಾ ಘಾಂಟಿನಿ ತ್ರಾಣ್ ನಾ ಜಾಲಾಂ

ಪಳ್ಳೆಂತ್ಲ್ಯಾ ಬಾಂಗಾನಿ ಅವಾಜ್ ಉಣೊ ಜಾಲಾ

ಇಗರ್ಜೆಂತ್ಲ್ಯಾ ಬಾಂಕಾನಿ ಜೀವ್ ನಾ ಜಾಲಾ

ದೆವಾ ಸಮೊರ್ ಕಿತೆಂಚ್ ನಾ ಜಾಲಾಂ

ಸಂಸಾರಾರ್ ಅಸಾತ್ ವಿಜ್ಞಾನಿಂ‌ ಕೊರೊಡಾನಿ‌

ಸದಾಂಚ್ ಬುಡೊನ್ ಅಸ್ತಾತ್ ನವ್ಯಾ ನವ್ಯಾ ಸೊದ್ನಾನಿಂ

ದೆವಾಕಚ್ ಸೊದೊಂಕ್ ಚಿಂತ್ಲೆಲ್ಲೆಂ ತಾಂಚ್ಯಾ ಟೆಕ್ನೊಲೊಜಿನಿ

ತರೀ ಕೊರೊನಾಕ್ ವಕತ್ ಸೊದೊಂಕ್ ತಾಂಚ್ಯಾನ್ ಜಾಲೆಂನಾ ಅಜುನಿ

ತಾಂಚ್ಯಾ ಗಿನ್ಯಾನಿಂ‌ ಚಂದ್ರಾಯಾನಾ ಕರೊನ್ ಆಯ್ಲೆ

ವ್ಹಡ್ ವ್ಹಡ್ ಸ್ಯಾಟಲ್ಯೆಟ್ ಕರೊಂಕ್ ಲಾಗ್ಲೆ

ದರ್ಯಾಕ್ ಸಯ್ತಿ ಸಾಂಕೊಂವ್ ಬಾಂದ್ಲೆ

ತರೀ ದೆವಾ ಸಮೊರ್ ಸರ್ವಾನಿಂ ಹಾತ್ ಬಾಂದ್ಲೆ

ರಾಜಕೀಯ್ ಪುಡಾರಿ ಘರಾ ಥಾವ್ನ್ ಬಾಯ್ರ್ ಯೆನಾಂತ್

ಜಾತ್ ಕಾತ್ ಮ್ಹಣ್ ಜಗಡ್ತಾಲೆ ಅಪ್ಣಾಚೊ ಜೀವ್ ಉರೊಂವ್ಕ್ ಪೆಚಾಡ್ತಾತ್

ಸಗ್ಳೆ ಮೌನ್ಪಣಾಂತ್ ಬಸೊನ್ ಖರ್ಗೊನ್ ಅಸಾತ್

ದೆವಾ ಸಮೊರ್ ಕೊಣಿ ಜಿಕೊಂಕ್ ಸಕ್ಲೆನಾಂತ್

ಕೊರೊನಾನ್ ಸರ್ವಾಂಕ್ ಆಕಾಂತಾಂತ್ ಬುಡಾಯ್ಲಾಂ

ತರೀ ಕಿತ್ಲೆಶ್ಯಾ ಕುಟ್ಮಾಕ್ ಸಾಂಗಾತಾ ಹಾಡ್ಲಾಂ

ಭುರ್ಗ್ಯಾಂಕ್ ಅವಯ್ ಬಾಪಾಯ್ಚೊ ಮೋಗ್ ಶಿಕಯ್ಲಾ

ವ್ಹಡಿಲಾಂಕ್ ಅಪ್ಲ್ಯಾ ಭುರ್ಗ್ಯಾ ಸಂಗೀ ವ್ಹೇಳ್ ಕರ್ಚೊಂಕ್ ಲಾಗಾಯ್ಲಾಂ

ಪರ್ದೆಶಾಂತ್ ಆಸ್ಲೆ ಎಕ್ಸುರೆ ಕುಟ್ಮಾಕ್ ಚಿಂತೊನ್ ರಡೊನ್ ಆಸಾತ್

ತಾಂಚ್ಯಾ ಬರ್ಯ್ಯಾಪಣಾಕ್ ಆಶೆವ್ನ್ ಪರ್ಗಾವಾಂತಚ್ ಉರ್ಲ್ಯಾತ್

ಗಾವಾಂತ್ಲೆ ಹಾಂಚ್ಯಾ ಸುರಕ್ಷಾಖಾತಿರ್‌ ದೆವಾಚಿ ಸಸಾಯ್ ಮಾಗ್ತಾತ್

ಎಕ್ಸುರ್ಪಾಣಾಚೆಂ ತಾಂಚೆ ದುಃಖ್ ಉಶ್ಯಾನಿಂ ಜಿರೊಂವ್ಕ್ ಲಾಗ್ಲ್ಯಾತ್

ದೆವಾ ಆಮಿ ನ್ಹೆಣಾಂವ್ ಕಿತೆಂ ಮ್ಹಣ್ ತುಜೆಂ ಪುಡ್ಲೆಂ ಮಿಸಾಂವ್

ಕಿತೆಯೀ ತರೀ ಜಾಂವ್ , ತುಜ್ಯಾ ಕುಶೆ ಪರ್ಮಾಣೆಂಚ್ ಜಾಂವ್

ಸಗ್ಳಾ ಸಂಸಾರಾ ಪಾಸತ್ ಮಾಗ್ತಾಂ ಆಜ್ ಹಾಂವ್

ವೋತ್ ಆಮಾ ಸರ್ವಾಂಚೆರ್ ತುಜೆಂ ದಯಾಳಾಯೆಚೆಂ ಬೆಸಾಂವ್...

✍ *ಸುರೇಶ್ ಸಲ್ಡಾನ್ಹಾ, ಸಕಲೇಶ್ಪುರ*