ಅರ್ದೊ ಪಾದ್ರಿ

ಬಿಸ್ಪಾಚ್ಯಾ ಸೆರ್ಮಾವಾಂಕ್ ಭುಲೊನ್

ಮೊಂತುಚೊ ಪೂತ್ ಅಂತೊನ್

ಗೆಲೊ ಸೆಮಿನರಿಕ್ ಯಾಜಕ್ ಜಾಂವ್ಕ್
ಲೊಕಾಚ್ಯಾ ಸೆವೆಂತ್  ಜೆಜುಕ್ ಅಪ್ಣಾಂವ್ಕ್

ದೀಸ್ ಮಾಜ್ವೊನ್ ವರ್ಸಾಂ ಉಬ್ಲಿಂ ತೀನ್
ಆಚಾನಕ್ ಮೊಂತು ಜಾಲೊ ದೆವಾದಿನ್
ತೆರೆಜ್ ವಳ್ವೊಳುಂಕ್ ಲಾಗ್ಲಿ  ಕಾಳ್ಜಾ ಪಿಡೆನ್
ಅಂತೊನ್ ಬುಡೊಂಕ್ ಲಾಗ್ಲೊ ಖಂತಿನ್

ಭಯ್ಣ್ಯಾಂಚೆ ಇಸ್ಕಾಲ್ ಗೆಲೆಂ ಗುಡ್ಯಾಕ್
ಪಯ್ಶೆನಾಂತ್ ಜಾಲೆ ಅವಯ್ಚ್ಯಾ ಪಿಡೆಕ್
ಕೊಣಾಗರ್ ಗೆಲ್ಯಾರಿ ಪಯ್ಶೆ ಮೆಳಾನಾ ಜಾಲೆ
ಮಹಿನ್ಯಾ ಬಿತರ್ ತೆರಜಾನ್ ಸಾಸ್ಣಾಕ್ ದಾಂಪ್ಲೆ ದೊಳೆ

ಭಯ್ಣ್ಯೊ  ಜಾಲ್ಯೊ ಅನಾಥ್
ಭಿಕೆ ಪ್ರಾಸ್ ಜಾಲಿ ತಾಂಚಿ ಗತ್
ಕುಟ್ಮಾಚೊ ಮೆಳೊಂಕ್ ನಾ ತಾಂಕಾ ಸಾಂಗಾತ್
ಚಿಂತೊನ್ ಪಿಶ್ಯಾರ್ ಜಾಲಿ ತಾಚಿ ಮೊತ್

ರೆಕ್ಟರ್ ಬಾಪಾಕ್ ಆಪ್ಲೆ ತೆ ದುಖ್ ಸಾಂಗೊನ್
ಬಿಸ್ಪಾಚಿ ಪರ್ವಣ್ಗಿ ಘೆವೊನ್
ಅಂತೊನ್ ಪಾಟಿಂ ಅಯ್ಲೊ ಸೆಮಿನರಿ ಥಾವ್ನ್
ಭಯ್ಣ್ಯಾಂಚೊ ಅಧುರೊ ಪುಡಾರ್ ಪಳೆವ್ನ್

ಹಾಡ್ ನಾತುಲ್ಲಿ ಜೀಬ್ ತಿ ಉಲೊಂವ್ಕ್ ಲಾಗ್ಲಿ
ಅಂತೊನಿಕ್ ನೊವಿಸಿಟ್ ಚೆಡ್ವಾಲಾಗಿಂ  ಚಂಗಾಯ್ ಆಸ್ಲಿ
ದೆಕುನ್ ತೊ ದೊರೊ ಉಡೊನ್ ದಾಂವೊನ್ ಆಯ್ಲಾ
ಬಿಸ್ಪಾನ್ ತಾಚಿ ಸೊರಿ ದರ್ನ್ ತಾಕಾ ಪಾಟಿಂ ಧಾಡ್ಲಾ

ಮೊಂತು ಮೊರ್ತಾನಾ ಕೊಣಿ ಮುಕಾರ್ ಯೆವ್ನಾ
ತೆರೆಜಾಕ್ ಸಯ್ತ್ ಏಕ್ ಪೆಟ್ ಕರೊಂಕ್ ಕೊಣಿ ಕುಮೊಕ್ ಕರೊಂಕ್ ನಾ
ವಾಡುಲ್ಲ್ಯಾ ಚೆಡ್ವಾಂಚಾ ಅವಾಜಾಕ್ ಕೊಣಿ ಕಾನ್ ದಿಂವ್ಕ್ ನಾ
ಏಕ್ ಮೂಟ್ ನೀಸ್ ಪೇಜ್ ಕೊಣೆಂಯ್ ತಾಂಕಾಂ ದಿಂವ್ಕ್ ನಾ

ಆಜ್ ಸಂಸಾರ್ ಭರ್ ಅಂತೊನ್ ನಾಂವಾಡ್ಲಾ
ಅರ್ದೊ ಪಾದ್ರಿ ಮಣ್ ಲೊಕಾನ್ ತಾಕಾ  ವೊಲಾಯ್ಲಾ
ಭಯ್ಣ್ಯಾಂಚ್ಯಾ ಪುಡಾರಾಕ್ ಜೀವ್ ತಾಣೆ ಝರಯ್ಲಾ
ಆಜ್ ತ್ಯಾಚ್ ಭಯ್ಣ್ಯಾನಿಂ ನಾಂವ್ ತಾಚೆಂ ಘಾಣಾಯ್ಲಾಂ.!

: - ಸುರೇಶ್ ಸಲ್ಡಾನ್, ಪನ್ವೆಲ್ ಅಬುಧಾಬಿ


Published in  :  Aankri .com