ಲೇಟೆಸ್ಟ್ ಟೆಕ್ನೊಲೊಜಿ...

ಅದಿಂ

ಮದ್ಲ್ಯಾ ಸಾಲಾಂತ್

ವೊಣೊದಿ ವಯ್ರ್

ಸೊಬ್ತಾಲಿ ಸೊಬಿತ್ ಅಲ್ತಾರ್ 

ತಾಂತು ಸಾಂತಾಭಕ್ತಾ ಸಾಂಗಾತಾ

ಭಾಗೆವಂತ್ ಖುರ್ಸಾ ಮದೆಂ 

ಸೊಬ್ತಾಲಿ ಸಾಯ್ಬಿಣ್ ಅಂಕ್ವಾರ್

ವಡ್ಲಿ ಮಾಂಯ್ ಸಂಗಿ

ತೆರ್ಸ್ ರಜಾರ್ , ಗಾಯಾನಾ ಗಾವ್ನ್

ವಡಿಲಾಂಚೆ ಬೆಸಾಂವ್ ಮಾಗೊನ್

ಅಸುಲ್ಯಾಂತ್ಲೆಂ ವಾಂಟುನ್ ಖಾವ್ನ್

ಎಕಾಮೆಕಾಚೆ ಸುಖ್ ದುಖ್ ಉಲೊವ್ನ್

ನಿದ್ತೆಲ್ಯಾಂವ್ ಎಕಾಚ್ ವೊಳಿಂತ್ ಗುಸೊನ್

ಅತಾಂ .‌.‌.‌.

ಮದ್ಲಾ ಸಾಲಾಂತ್, ವೊಣೊದಿ ವಯ್ರ್

ಸೊಬ್ತಾ ಚಾಳಿಸ್ ಇಂಚಾಚಿ ಎಲ್.ಇ.ಡಿ.ಟಿವಿ

ತಾಂತು ಸೊನಿ,  ಜಿ ಸಿನಿಮಾ ,  ಜಿ ಟಿವಿ, 

ಸಾಂಗಾತಾ ಅನೇಕ್ ಕಲರ್ಸ್ ಚಾನೆಲಾಂ

ಹಾತಾಂತ್ ಆಸ್ತಾತ್  ಮೊಲಾದಿಕ್ ಮೊಬೆಲಾಂ

ಮಾಜ್ವೊನ್ ಗೆಲ್ಯಾತ್ ದೆವಾಚಿ ಪಾಯ್ನಾಲಾಂ

ಸೊಫಾರ್, ಬೆಡ್ಡಾರ್, ಬಾಲ್ಕಾನಿಚೆರ್, ರಾಂದ್ಚ್ಯಾಕುಡಾರ್, 

ಆಸ್ತಾತ್ ಸರ್ವ್ ಬಿಝಿ ಮೊಬಾಯ್ಲ್ ದಾಂಬ್ಚಾರ್

ವ್ಹೆಳಾರ್ ನಾ ಘರಾಂತ್  ಆಮೊರಿ ಯಾ ತೆರ್ಸ್ ರಜಾರ್ 

ಸೊವಿಸ್ ವ್ಹರಾಂ ಆಸ್ತಾತ್ ಪೇಸ್ ಬುಕ್, ಸ್ಕೈಪ್,  ವಾಟ್ಸಾಪಾರ್

ನಾ ವೇಳ್  ಎಕಾಮೆಕಾಕ್ ಉಲೊಂವ್ಚ್ಯಾಕ್

ನಾ ವೇಳ್ ಸಾಂಗಾತಾ ಬಸೊನ್ ಜೆಂವ್ಚಾಕ್

ಪಿಜ್ಜಾ , ಕೆ.ಎಫ್.ಸಿ. ಆನಿ ಇತರ್  ಬಾಯ್ಲ್ಯಾ  ಖಾಣಾಂತ್

ಆಜ್ ಮ್ಹನಿಸ್ ಭಿಗಾಡ್ಲಾ ಐಶಾರಾಮಾಚ್ಯಾ ಜೀವನಾಕ್

ದೆವಾನ್ ಮ್ಹನ್ಶ್ಯಾಕ್ ಭರ್ಲೆಂ ಜಾಣ್ವಾಯೆಂತ್

ಮ್ಹನಿಸ್ ಬುಡ್ಲೊ ಲೆಟೇಸ್ಟ್ ಟೆಕ್ನೊಲೊಜಿಂತ್

ಅಶೆಂಚ್ ಅಮಿ ದೆವಾಕ್ ವಿಸ್ರೊನ್ ಬುಡ್ಲ್ಯಾರ್ ಸೊಶಲ್ ಮಿಡಿಯಾಂತ್

ಖಂಡಿತ್ ಲಾಸ್ತೆಲ್ಯಾಂವ್ ಯಮ್ಕೊಂಡಾಚ್ಯಾ ಉಜ್ಯಾಂತ್

  ಸುರೇಶ್ ಸಲ್ಡಾನ್, ಪನ್ವೆಲ್ ಅಬುಧಾಬಿ


Published in  :  Aankri .com